SRP sa mga School Supplies, Gipagawas na sa DTI

Nipagawas na og suggested retail price (SRP) ang Department of Trade and Industry (DTI) alang sa presyo sa mga school supplies.

Base sa gipagawas nga listahan sa DTI, wala kaayo’y nahimong paglihok sa presyo sa mga gamit pang-eskwela sama sa notebook ug ballpen kun itandi sa niaging tuig.

Mopatak lamang sa P10.00 ang pinakabaratong brand sa notebook samtang naa sa kapin P30.00 ang mga branded.

Nagduwa sa P9.00 ang pinakabaratong klase sa writing pad paper ug mokabat ang presyo niini taman sa kapin P40.00.

Samtang ang krayola, mokabat sa kapin P11.00 ang presyo sa walo kabuok niini samtang mokabat usab sa P50.00 ang presyo sa duha ka dosena niini.

Mopatak usab sa kapin P6.00 ang presyo sa pinaka-mahal nga ordinaryong lapis.

Ang presyo sa ordinaryong ballpen usab, nagduwa sa kapin P4.00 taman P10.00 matag usa.

Kalabot niini, gitambagan sa DTI ang mga ginikanan nga adunay daghang anak nga motungha sa klase karong nagsingabot nga pagsugod sa klase nga mopalit og bulto aron mas maka-barato sa gasto.

Sa pagkakaron, may usa ka buwan pa ang mga estudyante ug ginikanan aron mag-andam sa mga gikinahanglang gamit sa eskwela. (ecb/PIA7-Bohol)