Sinulog Parade Karong Hapon

Ipahigayon karong hapon ang opening salvo sa Sinulog cultural activities pinaagi sa hamubo nga parada sa mga Sinulog dancers nga manukad sa Basilica del Santo Niño paingon sa Cebu City Sports Center.

Ang 12 ka Miss Cebu candidates maoy mag-una sa parada nga magsakay og karaan nga mga sakyanan aron maghatag og dugang kamabulokon sa mao nga kalihukan.

Nagpasabot nga tungod sa mao nga kalihukan magkaguliyang na usab ang mga sakyanan sa downtown area kay ang Osmeña Boulevard dili man kaagian sa mga sakyanan.

Ang kadagkoan sa City Traffic Operations Management (CITOM) mipagawas og mga rerouting plans ug miawhag sa mga drayber nga ila ra g’yud nga sundon ang mga traffic signs.

Samtang gipahimangnoan sa CITOM ang mga motorista nga dili gayud ipataka og parada ang ilang mga sakyanan sama sa aseras ug daplin sa karsada aron dili kini i-clamp sa mga traffic enforcers.

Wala pa makabutyag ang CITOM kun pila ka sakyanan ang ilang na-clamp apan kanunay’ng hurot ang ilang mga clamp tungod sa kadaghan sa mga malapason.

Gitambagan sa mga traffic enforcers ang mga motorista nga dili na lang mopugos pagdala sa ilang mga sakyanan duol sa Basilica del Santo Niño kay lisud kaayo ang pagpangita og dapit nga kaparkingan.

Gikan sa Basilica, ang parada karong hapon moderitso sa Fuente Osmeña usa pa kini mobalik paingon sa Cebu City Sports Center diin adunay kalihukan nga giandam.

Ang ubang kalihukan nga may kalambigitan sa Sinulog mao ang pagpahigayon sa Sinulog sa Lalawigan karong Sabado ug ang Sinulog sa Dakbayan inigka Domingo.

Ang laing dako nga reliheyoso’ng kalihukan sa Sinulog mao ang Walk with Mary unya sa kaadlawon sa Enero 16 nga manukad sa Fuente Osmeña paingon sa Basilica.

Nagpasabot nga ang dagan sa mga sakyanan nga moagi moagi ug molagbas sa Osmeña Boulevard apektado gikan sa pagsugod hangtud na sa pagkahuman sa Walk with Mary.

Ang imahen sa Birhen sa Guadalupe maoy iprosesyon uban sa imahen ni Santo Niño ug inig-abot niini sa Basilica, ihatud na usab sa Mandaue human sa Misa de Traslacion aron adto bilaran sa simbahan sa Saint Joseph sa dili pa kini iprosesyon sa kadagatan inigka Sabado sa buntag diin gatusan ka sakayan ang mosalmot sa Fluvial Procession.

Sugaton sa kaparian ang imahen ni Santo Niño anha sa Pier 1 ug dayon dad-on kini sa Basilica diin himuon ang reenactment sa una’ng bunyag nga gihimo ni Magellan kaniadto ngadto nila ni Rayna Juana ug King Humabon.

Inigka Sabado sa hapon unya sa Enero 17, himuon na usab ang pagprosesyon sa orihinal nga imahen ni Santo Niño nga maoy ludhan ug makita diha sa gamay’ng kapilya sulod sa Basilica.

Kaliboan ka deboto ni Santo Niño ang mokuyog sa procession nga manukad sa Basilica, mosubay sa Osmeña Boulevard paingon sa Fuente Osmeña, dayon sa General Maxilom Avenue, M.J. Cuenco Avenue ngadto na sa Plaza Independencia ug balik sa Basilica.

Ang carousel-type nga Sinulog grand parade inigka Enero 18, anha gihapon pagahimoa sa sama nga dapit gikan sa Sports Center, P. del Rosario, Imus Road, General Maxilom Avenue paingon sa Fuente Osmeña, dayon subay sa Osmeña Boulevard ngadto na sa Cebu City Sports Center.