Signature Campaign sa Anti-Pork Barrel Coalition, Babag sa Comelec

Gibutyag sa Commission on Elections (COMELEC) nga dakong babag sa ilang mga kalihukan ang gipasiugdahang signature campaign sa grupo nga gitawag og anti-pork barrel coalition.

Matud pa ni Provincial Supervisor Atty. Lionel Marco Castillano kagahapon sa buntag nga tataw kaayong malangan ang ilang preparasyon sa election sa Sanguniang Kabataan sa sunod tuig ug sa presidential election sa tuig 2016 gumikan sa gipasiugdahang signature campaign sa Anti-Pork Barrel Coalition.

Miingon si Castillano nga tumong niining maong grupo mao ang hingpit nga pagbasura sa pork barrel sa mga departamento sa ehikutiba ug lehislatiba.

Mitataw si Castillano nga magkinahanglan kini og igong gidugayon sa panahon ug dugang gahin nga salapi nga igasto sa pagsuta sa mga pirma sa mga botante nga himoon pinaagi sa Peoples Initiative.

Matud ni Castillano nga lisod ang ilang tahas sa naasoy nga peoples initiative kay 10 porsyento man sa tibuok populasyon sa mga botante sa tibuok nasud ug 3 porsyento matag distrito ang tinuon nila nga mga pirma gayud sa mga botante.

Gani matud pa ni Castillano nga naglisod man ang COMELEC sa pag-verify sa pirma sa pipila ka mga election recall , “kana pa bang pirma sa ipahigayong signature campaign sa People’s Intiative”.

Gawas niini makuhaan na usab ang ilang budget niining tuiga hinungdan nga magkinahanglan na usab sila og dugang budget.

Hinuon gitataw ni Castillano nga mahimo ra gihapon kini sa ilang buhatan kun sayo masumiter ang maong lakang ug kompleto na usab ang tanang mga panginahanglan sa sa mga nagpasiugda sa peoples’ initiative.