Sergio Osmeña Ave. Sa NRA, Pasirad-an

Sigurado nga makasinati g’yud og grabe’ng problema sa trapiko ang mga motorista kay sirad-an na sa Lunes, karong adlawa, ang kabahin sa Sergio Osmeña Avenue sa North Reclamation Area (NRA) aron kini sementohon sa Department of Public Works and Highways (DPWH).

Si Joy Tumulak, operations officer sa City Traffic Operations Management (CITOM), miingon nga adunay posibilidad nga ang ubang motorista ari na moagi sa M.J. Cuenco Avenue.

Sa kaniadtong bukas pa ang kanhi McArthur Boulevard alang sa mga sakyanan, pirmi lang maghuot ang mga sakyanan sa M.J. Cuenco Avenue.

Ang karsada nga sirad-an sa DPWH aron sementohon nahimutang kilid nga bahin sa Radisson Blu Hotel tungod g’yud sa Cebu International Port.

Molanat pa og Lima ka Buwan

Adunay gitas-on nga mohapit usa ka kilometro ang mao nga karsada nga sementohon sa DPWH ug ang pagsemento gibana-bana nga molungtad og lima ka buwan.

Tempraryo’ng Rota

Matud ni Tumulak nga kadtong mga sakyanan nga gikan sa Mandaue ug mopaingon unta sa Plaza Independencia, moliko sila sa tuo paingon sa Juan Luna Street inig-abot nila sa Radisson Blu Hotel.

Ang mga sakyanan moliko na usab sa wala inig-abot sa una nga eskina sa karsada nga gitawag og Briones Street.

Ang mga motorista moderitso paingon sa direksyon sa karaang White Gold ug inig-abot nila sa General Maxilom Avenue Extension, moliko na usab sila sa wala.

Inig-abot sa mga motorista sa eskena Maxilom Avenue Extension moliko na usab sila sa tuo ngadto na sa Plaza Independencia.

Kadtong mga sakyanan nga gikan sa Plaza Independencia ug nagtinguha nga mopaingon sa Mandaue, inig-abot nila sa gisirad-an nga eskena General Maxilom Avenue Extension, moliko sila sa tuo ug mosulod sa Baclig Street.

Ang gitawag og Baclig Street mao kana’ng karsada nga naglumbay ra sa Sergio Osmeña Avenue apan tua sulod na sa koral sa Cebu Port Authority.

Adto na ang mga sakyanan mogawas sa Baclig Street ug mibalik pagsubay sa Sergio Osmeña Avenue kun mosaylo na sila sa eskena diin pagasugdan ang pagsemento.

Hangtud pa sa Katapusan sa Tuig

Matud ni Tumulak nga kinahanglan nga planohon g’yug ang pagbiyahe alang niadtong mga nagdali. Human sa pagsemento sa mao nga bahin sa karsada, isunod na usab ang pagsemento sa unahan nga bahin lahos na sa eskena R. Palma sakop sa Barangay Tinago.

Kini nagpasabot nga hangtud sa kataposang bahin niining tuiga ang mga motorista makasinati og problema sa trapiko diha sa mao nga karsada.

Nahukman sa DPWH nga sementohon ang mao nga karsada kay kun aspalto lang, kanunay kini nga maguba tungod sa bug-at kaayo nga mga sakyanan nga anha mag-agian nga maghakut og container vans paingon sa pantalan.