Sergio Osmeña Ave. Anam-anamon Pagsira

Dili na sirad-an sa hingpit ang tibook Sergio Osmeña Avenue sa North Reclamation Area (NRA) karong adlawa.

Nauyonan nila ni Mayor Michael Rama ug sa mga opisyal sa Department of Public Works and Highways (DPWH), Cebu Port Authority ug City Traffic Operations Management (CITOM) nga anam-anamon lang pagsirado ang maong karsada.

Matud sa mayor nga samtang sirad-an ang usa ka “lane” sa karsada, ang pikas nga “lane” padayon nga paagian sa mga sakyanan.

Karong buntag, si Mayor Rama ug ang mga opisyal sa nahisgutang ahensya sa kagamhanan mosuhid sa mao nga karsada sa dili pa sila magtagbo sa duol nga hotel aron magpirmahay og kasabotan.

Ang mata’g “lane” sa Sergio Osmeña Avenue (kanhi McArthur Boulevard) kaagian gani og tulo ngadto sa upat ka sakyanan.

Kun sirad-an na ang usa ka “lane” sa karsada, ang bugtong “lane” nga mahabilin maoy posible nga agian na sa magsugat nga sakyanan.

Sirad-an unta sa DPWH ang tibuok karsada aron madali ang pagsemento nila sa kabahin sa Sergio Osmeña Avenue nga nahimutang luyo sa Radisson Blu Hotel.

Ang mao nga bahin sa karsada kanunay lang maguba tungod sa mga dagko nga sakyanan nga mangagi nga bug-at kaayo og karga paingon ug gikan sa pantalan.