Serbisyo Nga Alang Sa Tanan

Liboan ka mga molupyo sa Barangay Sapangdaku nga usa sa 80 ka barangays ning syudad ang natabangan sa mga libreng serbisyo nga alang sa tanan niadtong Marso 16, 2016 Miyerkules pinaagi sa ”City Hall At Your Doorstep” kon “Piyesta sa Pagpangalagad” sa kagamhanan sa dakbayan sa Sugbo.

Ang programa inisyatiba ni Cebu City Mayor Michael Lopez Rama nga natukod niadtong tuig 2010 diin ang 22 ka mga departamento sa City Hall maghatod sa mga libreng serbisyo ngadto paduol sa mga katawhan ngadto usab sa ilang tagsa-tagsa ka mga barangay.

Ang maong programa nagahatag ug libreng batakang panerbisyo alang sa tanan sama sa kosultasyon sa rehistro sa pagkatawo, pagpakasal, ug pagkamatay; pagpangtuli, nutrition feeding ug timbang sa mga kabataan; medikal nga konsultasyon; pag-ibot sa ngipon; pagpanglimpyo sa mga kanal ug drainage; pagpanaod ug pagpang-ayo sa mga street lights; ug pagrehistro, kapon ug bakuna sa mga iro ug iring.

Gitanyag usab ang mga batakang serbisyo nga mao ang laboratory services sama sa blood typing ug blood sugar testing; pagpanghatag ug mga seedlings nga itanumay sama sa prutas ug utanon; paghatag ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, traffic rules, environmental awareness, fire prevention, mga kalihokan ug kalambuan sa dakbayan, ug uban pa.

Hugot usab ang suporta sa mga kawani ug opisyales sa Barangay Sapangdaku sa naasoy nga kalihokan nga gipangulohan ni Kapitan Lorna Damalerio kinsa mipasalamat kang Mayor Rama sa paghimo sa programa ug sa tanang kawani sa dakbayan nga mihatag sa ilang kinasing-kasing nga pagpangalagad.

Atol sa pakighinabi sa BARUGG News, matud ni Milagrosa Namucatcat, usa lamang sa natabangan sa programa nga, “Dako gyod among pasalamat ni Mayor Rama ug sa mga kawani sa City Hall kay naay libreng serbisyo pabor na gyod ni sa mga katawhan kay libre na ang serbisyo naa pa gyod dinhi sa among barangay.”

Dugang pa niini nga angayan gyod ipadayon ang kalihokan aron mas daghan pang matabangan matag barangay.(Cebu City Public Information Office PIO/Greggy Jiggs P. Senados)