Serbisyo Nga Alang Sa Tanan

Padayon ang paghatod sa mga batakang serbisyo sa kagamhanan ning dakbayan ngadto sa tugkaran sa mga Sugbuanon.

Dili man kini literal nga tugkaran sa ilang mga panimalay apan adto gayod sa ilang tagsa-tagsa ka mga barangay.

Kini pinaagi sa programang “City Hall at your Doorstep” kon “Piyesta sa Pagpangalagad” nga inisyatiba ni Mayor Michael Rama sukad pa niadtong tuig 2010.

Karong adlawa ang mga residente sa Sitio San Miguel Community, Salinas Drive Extension, Barangay Lahug maoy natabangan sa mga libreng serbisyo sa 22 ka departamento sa Cebu City Government.

Si Lola Rosalinda Careno, 65 ang edad, usa lamang sa mga nakabenepisyo sa mga libreng serbisyo nga nagpakonsulta sa doktor tungod sa sakit sa tuhod ug diabetes.

Sa pakighinabi sa BARUGG News, gitataw niini nga, “Maayo man ni ang gihimo ni Mayor Rama kay naglantaw siya sa kaayohan sa mga katawhan ug nagpasalamat gyod ko nga natabangan kay kana pay akong adtoon sa hospital.”

“Angay gyod ning ipadayon Sir aron mas daghan pang matabangan ang mga naay sakit mahatagan ug tambal ang wala pa kahibalo nga naa diay silay sakit makahibalo na sa sayong panahon,” dugang giasoy ni Lola Rosalinda.

Naglangkob sa mga gitanyag nga serbisyo sa 22 ka mga Departamento sa Cebu City Hall mao ang konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; ug paghatag ug nagkadaiyang mga tambal ug bitamina, ug uban pa.

Kahinumdoman nga ang Barangay Lahug dugay na nga nahikawan sa mga proyekto ug mejoras hilabina sa milabayng administrasyon tungod sa politikanhong kaakohan sa namunoan niini.

Sa administrasyon ni Mayor Rama ang Barangay Lahug wala gyod pasagdi sa paghatag ug mga kaayohan ug proyekto. Gani bag-o pang nakadawat ang barangay ug bag-ong sakyanan nga personal mismo nga gidawat ni Lahug Barangay Kapitan Jovito Taborada Jr. didto sa Plaza Sugbo.

Bisan pa ug wala suportahi sa mga opisyales sa naasoy nga barangay ang maong kalihokan, sa kinatibuk-an nagmalampuson gihapon kini uban sa pagsalmot sa liboan nga mga residente niini.

Dugang pa, nagpadayon ang paghatag sa mga batakang serbisyo pinagi sa maong programa nga walay gipili ug pinalabi sa 80 ka mga barangays nga naglangkob ning syudad kini diha sa paghatag ug serbisyo nga alang sa tanan. (Cebu City Public Information Office PIO/Greggy Jiggs Senados)