Seniors Makadawat Na’g Dos Mil Karong Mayo 2

Sigurado nga mobahakhak og katawa sa kalipay ang mga senior citizens dinhi sa dakbayan karong sunod semana tungod kay ang mga senior citizens dinhi sa dakbayan sa Sugbo makadawat na usab og ‘tag P2 mil karong Mayo 2.

Si Mayor Michael Rama mihatag og kamandoan nga ang pagpanghatag sa hinabang-salapi ngadto sa mga Lolo ug Lola adto gihapon ipanghatag sa lainlaing kabarangayan.

Kun madawat sa mga seniors ang ‘tag P2 mil karong sunod semana, nagpasabot kini nga moabot na og P3 mil ang ilang nadawat sa cash assistance para karong tuiga.

Moabot og mga P120 Milyones ang gastohon sa dakbayan karong Mayo 2 alang ra sa pagpanghatag og hinabang-salapi ngadto sa mga 60 mil ka senior citizens dinhi sa dakbayan.

Ang Cebu City Council mitagana og P720 milyones karong tuiga alang sa pagpanghatag og mga cash assistance sa mga seniors.

Nagpasabot nga ang kada usa sa 60 mil ka seniors dinhi sa dakbayan makadawat unta og tag P12 mil.

Apan si Mayor Rama mihukom nga tag P6 mil ra ang cash assistance nga iyang ipahatag sa mga seniors, duna pa hinuo’y laing tabang nga iyang gipasalig apan wala pa mahibaw-i kun unsa.

Sa laing bahin, ang mga opisyal sa barangay pahatagan na usab ni Mayor Rama sa ilang additional honorarium gikan sa City Hall alang sa buwan sa Enero, Pebrero ug Marso.

Ang mga kapitan pahatagan ni Rama og ‘tag P5 mil, ang mga konsehal P3 mil, unya ‘tag P2 mil sa mga secretary ug treasurer sa barangay.