Senior Citizens, Awtomatiko Nang Miyembro sa PhilHealth

Gilagdaan na ni Presidente Benigno ‘Noynoy’ Aquino III ang Republic Act 10645 nga nagmando sa awtomatikong membership sa Philippine Health Insurance Corporation (PhilHealth) sa tanang senior citizen sa nasud.

Ubos niining balaod, makakuha na dayon og benepisyo ubos sa PhilHealth ang mga senior citizen kun ipakita nila ang ilang senior citizen ID sa mga ospital nga miyembro sa PhilHealth.

Maggikan ang pondo niini sa National Health Insurance Fund sa PhilHealth.

Epektibo ang maong balaod 15 ka adlaw human kining mapamantala sa Official Gazette o di kaha sa duha ka pahayagan.

Nob. 5 kini gilagdaan sa Presidente ug namantala sa mga pahayagan niadtong Nobyembre 10.

Gibanabanang naa sa 6.1 milyon ang mga senior citizens sa nasud o mga katawhan nga may edad 60 anyos pataas. (ecb/PIA7-Bohol)