Scholar sa Syudad, Mi-gradwar Cum Laude

Ang una’ng batch sa mga Cebu City scholars nga gitabangan sa kagamhanan sa dakbayan aron makapadayon sila pagtungha sa kolehiyo nakatapos na g’yud sa ilang mga kurso.

Usa kanila – si Jhanel Flores — gi-swerte pa g’yud kay nahimong Cum Laude sa pagkuha niya sa kurso nga Bachelor of Science in Education (BSEd) Major in Mathematics sa Cebu Normal University (CNU).

Si Flores, 19-anyos nga nagpuyo sa Sitio La Guardia, Barangay Lahug, miadto g’yud sa balay ni kanhi Kongresista Tomas Osmeña sa Barangay Guadalupe aron pagpasalamat sa natabang niini nga nakalampus siya sa pagtuon.

Matud ni Jhanel nga kun wala pa ang scholarship program sa dakbayan sa Sugbo nga proyekto ug gisugdan pagpatuman kaniadto atol sa administrasyon ni Osmeña nga mayor pa sa dakbayan, dili g’yud unta siya makalampus sa iyang pagtungha.

Anak lang si Jhanel ug kabus nga mga ginikanan. Ang iyang amahan nga si Solomon usa lang ka family driver nga P300 lang ang sweldo mata’g adlaw samtang wala ‘say trabaho ang iyang inahan.

Pagtapos ni Jhanel sa sekondarya sa Apas National High School kaniadtong 2010 mipahimulos siya sa scholarship program sa dakbayan og mitungha sa CNU.

Sa miaging semana mapagarbohon kaayo ang iyang mga ginikanan nga misaka sa stage atol sa graduation kay dihang midawat si Jhanel og diploma ug gitauran siya sa medalya human mapili nga maoy Cum Laude sa ilang kurso.

Ang mata’g scholar sa dakbayan sa Sugbo makadawat og P10 mil nga scholarship grant mata’g semester. Ang programa nga gisugdan kaniadto ni Osmeña gipadayon usab ni Mayor Michael Rama.

Pagka karon, kapin na sa 10 mil ka scholars sa dakbayan sa Sugbo nga gipagahinan og P480 milyones nga budget karong tuiga.