SC Milig-on Pagbalhin sa Eksamin sa Bar

Aprobado na sa labawng hukmanan ang pagbalhin sa laing buwan sa eksaminasyon sa abogasiya sa nasud, sugod niining tuig 2015.

Gipahibawo kini sa Philippine Information Agency (PIA) kinsa miingon nga Nobyembre na og dili sa naandan’g buwan sa Oktubre ipahigayon ang 2015 Bar examinations.

Si information officer Elvira Bongosa mipahibawo nga kining maong kausaban nahimo human aprobahi sa Supreme Court (SC) ang pagbalhin sa buwan sa maong eksamin.

Sayo niini girekomendar sa Philippine Association of Law Schools (PALS) nga angay na nga ibalahin ang buwan sa bar examinations tungod sa pagbag-o sa academic calendar ug pagsugod sa pagbukas sa klase sa daghang law school, sumala ni Bongosa.

Nagkanayon si Bongosa nga sa tuig 2011, dihang gitakda ni Bar Chair SC Associate Justice Roberto Abad ang pagpahigayon og eksamin sa buwan sa Nobyembre aron malikayan ang maulanon nga panahon matag Setyembre.

Apan bisan pa niini, sa tuig 2012 hangtud 2014 , gibalik na usab sa buwan sa Oktobre ang maong eksamin sa abogasiya, dugang pa ni Bongosa.

Samtang gipahayag usab ni Bar Confidant Cristina Layusa nga wala pa natumbok ang lugar nga pahigayonan sa ika-114 Bar exam sa Pilipinas nga pangunahan ni Associate Justice Teresita Leonardo-de Castro.

Matud pa ni Bongosa nga ang bar examination ipahigayon sa upat ka semana sa Nobyembre, niining tuiga.