Sawa Nga Dili Mamaak Gikalingawan sa Cebu City Zoo

Duha ka dagku kaayong bitin nga mora’g paa sa bata ang gidak-on maoy naghatag og kalingawan sa mga tawo nga mobisita sa Cebu City Zoo matag adlaw.

Ang mao nga mga bitin dili mamaak og tawo og gani mahimo kini nga imong unlanan ang iyang lawas ug mahimo pa nga patilap-tilapan ang imong nawong sa iyang mga dila.

Si Cebu City Administrator Jose Marie Poblete nga nakabisita sa zoo miapil sa pagpakamang sa bitin diha sa iyang lawas samtang siya mihigda sa gituyo paghimo nga kawayan nga sawog.

Matud sa caretaker sa mao nga mga bitin, mga Burmese python ang maong mga bitin nga nagpasabot nga sagad kini makita didto sa Burma.

Ang matag usa ka bitin mokaon og mga 15 ka manok sa anam-anam nga paagi sa usa lang ka higayon. Ang bitin kausa ra mokaon sulod sa usa ka buwan.

Ang ubang bitin langsa kaayo og baho apan ang duha ka dagkung bitin sa zoo walaybaho sanglit sayo sa buntag una pa sila nga pakaligoon kay sa mga caratakers.

“Sus una pa nga makaligo kining maong mga bitin kay sa nagbantay nila. Amo g’yud sila nga limpyohon kanunay aron nga walay baho kon adunay mga tawo nga mohikap kanila,” matud sa usa ka caretaker.

Kaniadto, ang batan-ong tigre nga gihinganlan og Bogart maoy kanunay bisitahan sa mga tawo kay dili usab kini mamaak, apan pagkamatay ni Bogart sayo niining tuiga, ang tagdumala sa zoo nakakita’g paagi nga ilisan nila sa dagkung bitin ang attraction sa zoo.

(Image Credit: cebuzoo.blogspot.com)