Santo Papa Mipalig-on sa Paglaum sa mga taga Tacloban

Gipalig-on ni Pope Francis ang pagtuo sa mga biktima sa bagyong Yolanda sa Santos nga Misa nga iyang gipangunahan sa Tacloban Airport sa miaging Sabado.

Matud pa ni Elvira Bongsa sa Philippine Information Agency (PIA) nga sa wali sa Santo Papa kini miingon nga nga mibisita siya sa Tacloban aron ipasalig nga wala nagpasagad ang Diyos sa tanang molupyo sa maong lugar.

Nagkanayon si Bongosa nga gipasalig sa Santo Papa nga gitahod niya ang sentimento sa mga biktima pagkahuman sa katalagman, may malagmit nawad-an og paglaum ug pagsalig, ilabi na sa nawad-an sa mga minahal sa kinabuhi ug panginabuhian.

Apan miingon ang Santo Papa nga ang tanang kagul-anan lumalabay lamang busa angay nga lig-onon ang paglaum ug pagsalig sa matag usa.

Matud pa sa Santo Papa, nasabtan ug nadungog sa Diyos ang kasub-anan sa tanan.

“I come to tell you that Jesus is Lord and he never lets us down. He was consecrated as Lord on that throne and there he experienced all calamities that we experienced. Jesus is Lord, and the Lord from the cross, is there for you. Therefore, he is capable of understanding us as we heard in the first reading,” matud pa ni Pope Francis.

Nagkanayon si Bongosa nga gipasaligan sa Sto. Papa ang taga Tacloban dili makalimot ang Dios sa ilang mga naagian nga kasinatian niadtong mihapos kanila ang kaisug sa bagyong Yolanda.

“So many of you have lost everything. I don’t know what to say to you, but the Lord does know what to say to you. Some of you lost part of your families, all I can do is keep silence, and I walk with you all with my silent heart,” dugang pa sa Santo Papa.

Sumala ni Bongosa nga migahin og ‘moment of silence’ ang Santo Papa alang sa mga biktima sa bagyo ug gi-aghat ang mga nitambong sa misa nga ipagawas kun unsa ang anaa sa ilang kasingkasing.

Midugang si Bongosa nga kalibuan ang nitambong sa misa sa Santo Papa nga nahimong emosyonal ang ubang survivor sa bagyong Yolanda nga nakahilak sa mga pulong sa Santo Papa bisan sa kakusog nga hangin ug ulan tungod sa bagyong nasinati sa Eastern Visayas.