‘Sam-ang sa Lorega, Dalion Pag Habwa’

Si Mayor Michael Rama miawhag sa kabanayan sa mga gipanglubong sa karaang sam-ang sa Lorega-San Miguel nga dalion kini sa paghabwa tungod kay ang maong dapit hawanan na sa dakbayan.

Si Rama miingon nga kadtong mga bukog nga magpabiling dili mahabwa hangtud sa Marso 30, ang mga kawani sa dakbayan ang mokuha niini ug iponon pagbutang sa dakung kahon.

Gipasabot sa mayor nga gipadali niya ang pagpahimo sa reblocking ingon man ang pagbutang sa karsada nga kaagian sa mga trak sa bombero kun adunay sunog unya sa mao nga dapit.

Ang kadaghanan sa kabalayan nga nasunog sa dapit nga gitawag og Sitio Kamansi ug Lawis, sakop sa Barangay Lorega-San Miguel, nahimutang sa karaang “menteryo municipal.”

Lapad kaayo ang karaang menteryo apan anam-anam lang kini nga nahanaw kay ang sam-ang giugbokan og kabalayan nga nalakip sa sunog.

Si Mayor Rama miinsistir g’yud nga mugnaon ang lapad nga karsada nga molagbas sa dapit nga nasunogan.

Si City Engineer Jose Marie Poblete miingon nga gusto sa mayor nga dies metros ang gilapdon sa karsada nga mugnaon lagbas sa nasunogan.