Sakyanan sa Barangay, Wala pa Gi-Uli sa Kanhi Kapitan

Ang bag-ong kapitan sa Barangay Day-as mireklamo ngadto ni Mayor Michael Rama kay wala iuli sa kanhi kapitan ang sakyanan nga giisyu para unta sa ilang barangay.

Si Day-as Barangay Captain Jerome Puerto nagkanayon nga ang Toyota Hilux Plate number SKV-439 padayong gigamit-gamit ni kanhi barangay kapitan Ellery Cañada bisan dili na siya kapitan.

Ang mga opisyal sa Barangay Day-as nga kontra ni Cañada sa politika nangangkon nga aduna sila’y hulagway nga magmatuod nga ang sakyanan sa City Hall si Cañada pa gihapon ang padayong migamit.

Ang Cebu City Council, nga nakadawat usab og kopya sa suwat-reklamo ni Kapitan Puerto, mitugyan niining maong isyu ngadto sa kadagkoan sa Department of the Interior and Local Government (DILG).

Si Konsehal Freddie Ismas sa Barangay Day-as nagkanayon nga law-ay kaayo ang gihimo ni Cañada nga bisan ug dili na siya opisyal sa barangay padayong migamit sa sakyanan.

Atul sa miaging eleksyon sa barangay, si Cañada wala na makadagan kay napupos na ang iyang termino. Ang iyang kampo mipadagan og usa ka babaye nga suod kaayo sa kanhi kapitan apan gipilde ni Puerto.

Gusto ni Kapitan Puerto nga unta aksyonan dayon ni Mayor Rama ang iyang reklamo og bawion ang sakyanan nga Hilux nga padayong gigamit-gamit karon ni Cañada.

Dunay mga opisyal sa Barangay Day-as nga mitug-an nga duna sila’y giplanohan nga laing lakang batok sa kanhi kapitan aron matudloan kini’g leksyon nga dili tukma ang iyang gihimo.

Samtang ang hepe sa General Service Office (GSO) sa City Hall miingon nga iyang susihon kining reklamo ni Kapitan Puerto apan miangkon nga nasuta na g’yud nila nga ang sakyanan nga Hilux si kanhi Kapitan Canada pa gihapon ang migamit.