Sakyanan Gigamit Pagpatay ni Archival Nakit-an Na

Gituohan nga nagkaduol na ang kasulbaran sa pagbanhig ug pagpatay kang Atty. Noel Archival ug sa duha ka kauban niini kay matud pa nakit-an na sa mga awtoridad ang sakyanan nga gikatahong gigamit sa mga kriminal.

Ang maong sakyanan didto masakmit sulod sa impounding area sa PNP Highway Patrol Group (PNP-HPG-7).

Nakit-an ang sakyanan dihang gironda sa mga sakop sa National Bureau of Investigation (NBI) ug sa Special Investigation Task Group Archival (SITG-Archival) ang impounding area sa PNP-HPG-7 sa Sitio Sudlon, Lahug.

Ang pagronda sa hiniusa nga team sa mga tinugyanan sa balaod gihimo base sa Search Warrant nga giisyu ni Regional Trial Court (RTC) Branch 10 Judge Soliver Peras nga nagtugot sa pagsiksik sa impounding area sa HPG.

Alas 11 sa buntag niadtong Huwebes gisiksik sa NBI ug SITG-Archival ang dapit nga kanhi maoy gigamit nga provincial headquarters sa kapolisan ug karon gihimo na nga impounding area sa mga sakyanan nga nasakmit sa HPG-7.

Ang gibutang nga respondents sa search warrant mao si HPG-7 Regional Director Romualdo Iglesia, Deputy Director Eduardo Mara, Sr. Insp. Joselito Lerion ug SPO4 Edwin Galan.

Matud ni Judge Peras nga adunay basehan nga mopagawas siya sa search warrant batok sa maong mga polis tungod kay sila maoy dunay kontrol custodiya sa Red Toyota Corolla Vios (GSC-675); Red Toyota Corolla Vios (GSR -995); Gray nga Mitsubishi Strada (ZEZ- 932) ug laing Gray Mitsubishi Strada (NVD- 549).

Sa pagsusi sa upat ka subject vehicles, usa lang ang giingong nagpositibo, ang Toyota Corolla Vios (GSC-675). Ang maong sakyanan anaa na karon sa NBI.

Adunay nakuhang mga butang sulod sa maong awto nga gisusi pa kun makatabang ba sa imbestigasyon pagpatay ni Archival.

Si Cebu City Councilor Nestor Archival, igsoon sa gipatay nga abogado, miingon nga medyo mihayag na ang imbestigasyon sa kaso sa pagpatay sa iyang igsuon sa pagkadiskubre sa usa ka sakyanan nga gituohang nalambigit sa krimen.

Si SPO4 Galan miingon nga si Sr. Insp. Lerion ang in-charge sa mga sakyanan nga na-impound. Apan mibutyag kini nga dihang siya pa ang property custodian sa HPG, igo lang siya mopirma og Monthly Inventory ug wa siya’y nakuptan nga papeles o bisan usa ka yawe sa mga sakyanan.

Si NBI-7 Regional Director Max Salvador nagkanayon nga ang pagkasakmit sa usa ka sakyanan usa kini ka kalamboan alang sa kasulbaran sa pagpatay ni Atty. Archival. Matud niya natultolan nila ang maong sakyanan base sa testimonya sa ilang witnesses og documentary evidences.

Midugang si Salvador nga ipatawag nila si Iglesia, Mara, Lerion ug Galan sa ilang buhatan aron sukit-sukiton. Ang na-recover nga sakyanan ipaubos usab og forensic examination.

Samtang ang pangulo sa SITG, Sr. Supt. Noel Gillamac, mibutyag nga ang pagkakaplag sa sakyanan sulod sa impounding area sa HPG wala magpasabot nga sila g’yud ang gitumbok nga suspek sa pag-ambush ni Archival ug sa duha niya ka kauban.

Si Gillamac mitug-an nga ang HPG kanhi miyembro sa task group apan tunga-tunga sa imbestigasyon nakahukom sila nga ilang tangtangon human sila makadawat og impormasyon ug rekomendasyon sa pamilya kay adunay kaso nga gihuptan si Atty. Archival batok sa HPG-7.

Image Credit: cebudailynews.inquirer.net