Sakit sa mga Opisyal

Editor’s Note: This article was also published last week in The Freeman’s Banat News

Nakaagi ko sa hagip-ot kaayo nga karsada sa Barangay Capitol Site ug sa Barangay Kalunasan. Nakita nako ang pagka wala g’yuy ayo sa kapitan ug sa ubang mga opisyal niini’ng duha ka barangay.

Sigurado ko nga daghan ni sila’ng mga opisyal sa lain pa nga kabarangayan nga susama’ng walay ayo sa pagpanerbisyo ug nag-usik ra ang kagamhanan sa dakbayan sa Sugbo sa paghatag kanila’g dugang honoraryom matag buwan.

Mao g’yud ni ang “sakit” sa mga opisyal sa barangay nga maghinan-aw lang sa gihimo sa mga tawo nga ilang lumolupyo nga mapahimuslanon sa higayon pinaagi sa pagpalapad sa kabahin sa ilang balay ngadto sa daplin na g’yud sa karsada.

Unsa, wala mo’y mga utok nga makahuna-huna nga dili husto ang gihimo sa mga tawo nga mokoral na sa aseras nga aron anha unta ang mga tawo mosubay sa ilang paglakaw aron dili madam-agan sa mga sakyanan?

Gani, ang koral sa basketball court nga duol sa Barangay Hall sa Capitol Site anaa g’yud daplin sa karsada. Ang tarong og paghuna-huna makakita g’yud sa angay’ng aksyonan sa mga opisyal apan gasiga lang ang mga mata niini’ng mao nga mga opisyal nga walay gihimo.

Kun subayon nimo ang hagip-ot kaayo nga karsada gikan sa kilid nga bahin sa Kapitolyo agi sa Capitol Site barangay hall, unya lahos na sa Girls Scout Camp sa Barangay Kalunasan, daghan kaayo ka nga makit-an nga angay’ng aksyonan. Kana kun moandar pa ang imong utok sa tukma nga panerbisyo.

Ngano’ng wala man ninyo hawani ang aseras sa mga karsada sa inyo’ng barangay ug badlongon ang motukod og bisan unsa diha daplin sa karsada?

Unsa man kanang inyo nga pagka opisyal, aron lang ingnon? Aron lang makadawat og honoraryom sa barangay ug City Hall?

Kun ang inyo’ng batasan manakod og ang tanang opisyal sa barangay wala nay pagpakabana, moabot ang higayon nga mahanaw ang karsada sa kabarangayan.

Mahisama kini sa Rallos Street diha sa Barangay Suba nga paglabay sa katuigan nga gipasagdan lang sa mga opisyal, hingpit nga nahanaw ang karsada ug karon dagko na nga kabalayan ang nagbarog sa kanhi agianan sa mga sakyanan.

Awhagon nako si Mayor Michael Rama nga unta mopahigayon siya og “walk” diha sa mga karsada sa kabarangayan ug ang mouban mga opisyal sa barangay aron makakita sila sa angay’ng aksyonan.

Unsa, wala ka makakita sa mao nga talan-awon mayor Rama?