Rota Sa Prosesyon Sa Santo Niño Usbon

Usbon sa kadagkoan sa Basilica ug sa dakbayan sa Sugbo ang rota nga paagian sa prosesyon sa imahen ni Santo Niño karong Sabado kun mahitabo nga adunay kusog nga uwan ug maglunop sa pipila ka dapit sa dakbayan.

Ang orihinal nga rota sa prosesyon sa Santo Niño karong tuiga mao ang Osmeña Boulevard paingon sa Fuente Osmeña, dayon mosubay sa General Maxilom Avenue paingon sa Barangay Carreta, gikan sa Carreta moliko sa tuo subay sa New Imus Road.

Ang prosesyon moliko sa wala subay sa M. J. Cuenco Avenue paingon na sa Plaza Independencia ug subay sa Osmeña Boulevard balik na sa Basilica.

Apan sanglit nahibaw-an na nga ang atubangan nga bahin sa Tejero Elementary School dapit sa M.J. Cuenco Avenue kanunay man nga lunopan kun kusog ang uwan tungod sa pagsugwak sa sapa, ang rota sa prosesyon iliko na ngadto sa T. Padilla Extension.

Inig-abot sa eskena Serging Osmeña Avenue (kanhi McArthur Boulevard), ang prosesyon moliko sa tuo paingon sa Plaza Independencia, dayon liko sa Legazpi Extension, liko sa wala subay na usab sa M.J. Cuenco Avenue, liko sa tuo subay sa Osmeña Boulevard ug balik na sa Basilica.

Gibana-bana nga ang prosesyon ubanan gihapon og kaliboan ka tawo nga deboto ni Santo Niño bisan pa og masinati ang bati nga panahon tungod sa nagsingabot nga tropical depression nga Amang.