‘Road Separators’ Gipatangtang Alang sa Sinulog Grand Parade

Gipatangtang na ni Mayor Michael Rama ang mga sementado nga “road separators” taliwala sa General Maxilom Avenue aron molapad ang karsada nga kasayawan sa mga dance contingents nga mosalmot sa Sinulog Grand Parade karong Dominggo.

Sa milabay’ng mga Sinulog Grand Parade, ang mao nga mga road separators nakahasol sa mga dancers tungod kay nakapagamay kini sa lugar nga ilang kasayawan mao nga maglukso-lukso ra ang mga dancers nga moagi sa mao nga dapit.

Una nga gipatangtang ni Mayor Rama mao ang sementado nga road separator nga gitukod taliwala sa General Maxilom atubangan sa main entrance sa Caretta Cemetery.

Gisunod sa pagpatangtang sa mayor mao ang mga road separators nga nahimutang dapit sa eskena Gorordo ug General Maxilom Avenue. Gipatangtang usab ang mga road separators duol sa Iglesia Ni Cristo.

Si Ricky Ballesteros, nga mao ang Executive Director sa Sinulog Foundation Incorporated, miingon nga gipaninguhaan nila nga mapatangtang gayud ang tanang road separators sa General Maxilom Avenue.

Ang mayor miingon nga tukma lang ‘sab ang sugyot nga palapdan ang bahin sa karsada nga agian sa mga contingents pinaagi sa pagkuha sa sementado nga road separators atul sa Sinulog Grand Parade.

Ang mao nga mga road separators ibalik ra usab sa CITOM human sa Sinulog.