Rerouting sa NRA, Ipatuman sa Martes

Ang mga motorista nga moagi sa North Reclamation Area (NRA) duol sa SM City gipahimangnoan nga dunay gamay’ng problema sa trapiko nga ilang masinati sugod sa Martes, ugmang adlawa.

Ang City Traffic Operations Management (CITOM) mopatuman og rerouting kon pag-usab sa rota sa mga sakyanan nga moagi sa NRA, tungod sa pagsugod na sa DPWH pagsemento sa kabahin sa Serging Osmeña Avenue likud sa Radisson Blu Hotel.

Dili hinoon ang tibuok karsada dunganon sa pagsirado. Samtang sementohon ang pikas “lane,” ang laing bahin sa karsada paagian og sakyanan apan “one way” ra ang itugot.

Rota 12G, 12J ug 12I

Ang mga PUJ nga rota 12G ug 12J samtang magsubay sila sa Serging Osmeña Avenue gikan sa Plaza Independencia modisilya sila sa General Maxilom Avenue, modemano sa JL Briones (kanang karsada nga anaa ang opisina sa LTFRB), unya disilya na ‘sab sa Juan Luna Avenue duol sa SM, disilya na ‘sab sa J. de Veyra ug diritso na sa Benedicto Street lahus na sa T. Padilla Extension.

Si CITOM executive director Rafael Christopher Yap mipahibalo nga ang mga PUJ nga rota 12I samtang magsubay sa Serging Osmeña Avenue gikan sa Plaza Independencia modemano inig-abot sa eskena General Maxilom Avenue ug modisilya sa Baclig Street, kanang karsada nga anaa mahimutang sulod na sa port area.

Ang mao nga mga PUJ rota 12I inig-abot sa Quimonda loading ug unloading station, modisilya sa Juan Luna Avenue, disilya na ‘sab sa J. de Veyra Street, ug lahus na sa Benedicto ug T. Padilla Extension.

Rota 10H ug 10M

Matud ni Yap nga ang mga PUJ nga rota 10H ug 10M samtang magsubay sila sa Benedicto Street, modisilya sila sa General Maxilom Avenue, demano na ‘sab sa J. de Veyra Street, demano sa Road West 1 (kanang duol sa Conching), disilya sa Andres Soriano Avenue balik na sa iyang gigikanan.

Rota 04L ug 06H

Samtang ang mga PUJ nga rota 04L ug 06H samtang magsubay sila sa Juan Luna Avenue, modemano sila sa Andres Soriano, disilya sa Road West 1, disilya na ‘sab sa Road North 6, disilya na ‘sab sa Juan Luna Avenue balik na sa Lahug.

Alang niadtong mga motorista nga mopaingon sa port area, ang ganghaan sa pantalan nga nahimutang sa General Maxilom Avenue alang ra sa “entrance” samtang kadtong karsada sa pantalan duol sa Radisson Blu Hotel maoy para “exit.”

Giawhag ang mga motorista nga sundon ra g’yud ang mga traffic signs nga gipahiluna sa mga enforcers. Ang pagsemento sa DPWH gibana-bana’ng molanat og mga unom ka buwan.