Renewal sa Lisensya sa Armas, Gibalik sa PRO-7

Gikalipay pag-ayo sa mga tawo nga adunay mga pusil tungod kay ang pagbag-o sa lisensya gibalik na sa mga rehiyonal nga buhatan sa kapolisan sama diha sa Police Regional Office-7.

Si Senior Superintendent Erson Digal, hepe sa Regional Operations and Plans Division sa PRO-7, miingon nga nakadawat sila og kamandoan gikan sa Camp Crame nga modawat na pagbalik og application alang sa renewal sa mga gun licenses.

Kini tungod kay ang Supreme Court miisyu og kamandoan nga dili usa ipatuman ang kamandoan sa Camp Crame nga kadto’ng mga nag-iya og armas kinahanglan nga moadto gayud sa Firearms and Explosives Office
aron pagbag-o sa ilang lisensya.

Ang pipila ka kahugpongan sa mga “licensed firearm holders” mikwestyon sa lakang sa Camp Crame ug midala niini nga isyu didto sa Supreme Court.

Ang ilang argumento mao nga tungod sa lakang sa Camp Crame nga gihulagway nila nga paghasol-hasol sa mga naghupot og armas, mosangpot kini nga daghan sa mga tag-iya’g armas ang dili na makapa-renew sa ilang lisensya.

Kini gibasi nila sa dako kaayo nga gastohan sa plete sa tag-iya’g armas sa pag-adto sa Manila, pag-abang ug kapuy-an, ug sa uban pa nga mga gastohan.

Ang rekord nagpakita nga bisan dia gani sa rehiyon himoa ang pag-renew sa mga lisensya sa armas daghan pa ang dili dayon makabag-o sa ilang firearm license ug gilantawan nga ang problema mosamot kun pugson nga ang pag-renew adto na himoa sa Manila.

Tungod sa mao nga kalamboan, ang kadagkoan sa PRO-7 nangandam na aron nga sugod karong Lunes magsugod na sila sa pagdawat sa mga application sa mga gusto’ng mopabag-o sa lisensya sa ilang mga pusil.

Si kanhi Talisay City Councilor Aberdovey Belleza, ang presidente sa Talisay Aqua City Gun Club, miingon nga ang angay’ng himuon sa kapolisan mao ang paghingusog sa kampanya batok sa mga tawo nga naghupot og dili lisensyado nga armas ug dili ang paglisud-lisod sa mga licensed gun holders.