‘Red Tide’ Gibantayan

●Nasayran nga may nasigpatang presensiya sa red tide didto sa kadagatang bahin sa Zamboanga del Sur ug sa Bataan.

Gisugdan na sa pagmonitor sa Bureau of Fisheries and Aquatic Resource (BFAR)-7 ang pagtumaw sa red tide sa kadagatan.

Kini tungod sa nasinating pag-usab-usab sa panahon karon nga mokalit lang pag-ulan taliwala sa tumang kainit sa adlaw.

Ang buhatan ni BFAR-7 Regional Director Adres Bojos mipagawas na og kamanduan sa pagkuha na og sample sa tubig sa dagat dinhi sa Sugbo ug sa ubang mga lugar sa probinsiya sa Central Visayas ilabina sa mga lugar nga may kasaysayan bahin red tide.

Kini gibase usab sa advisory nga giluwatan sa nasudnong buhatan sa BFAR niadtong Mayo 8 ning tuiga.

Nasayran nga may nasigpatang presensiya sa red tide didto sa kadagatan sa Zamboanga del Sur ug sa Bataan.

Lakip nga pakuhaan og sample sa mga ginsakpan sa BFAR-7 ang mga gipamaligyang kinason ug isda sa kamerkadohan pagsuta kun wala ba kini red tide nga makahilo sa mga tawo nga makakaon niini.

Sayo niini, gipasabot sa BFAR-7 nga ang ulan maoy makadaghan sa mga enzymes sa dagat nga mahimong red tide kun kini mainitan ug mabugnawan nga mao usab ang sagad kan-on sa mga isda ug mga kinasanon.

Si Luzvinda Bato, ang chemist sa regional fishery laboratory sa BFAR-7, miingon nga niadtong bulan sa Marso sa ilang labing ulahing monitoring, namatud-an nila nga negatibo sa red tide ang kadagatan sa Central Visayas.

Apan niining nasinating pag-ulan-ulan sa pipila ka bahin sa Central Visays bisan pa man sa tumang kainit, mas hingusgan nila ang pagmonitor sa kadagatan, sa mga kinason ug isda sa kamerkadohan aron mabantayan dayon kun mitumaw ba sa tunga-tungang Kabisay-an ang ride tide.

Dugang pa ni Bato nga posible usab nga motumaw ang fish kill sa mga fish cages dinhi sa Visayas tungod sa pagdaghan sa mga enzymes o organismo gumikan sa pag-ulan nga makapakulang sa oxygen sa mga isda nga anaa sa sulod sa fish cage sa kadagatan.