Rama Wala Malipay nga Nagpunsisok ang mga Tawo sa Comelec

Ang katawhan karon dili kinahanglan nga mag-ilogay sa pagpa-rehestro sa mga opisina sa Comelec kay ang “continuing registration” molungtad pa hangtod sa Oktobre sunod tuig.

Matud pa nga adunay ubang tawo nga nagtoo nga ang pagpangrehestro himuon lang sulod sa pipila ka adlaw.

Kini maoy rason nga gipunsisokan sa katawhan ang mga opisina sa Commission on Elections (Comelec) atol sa una’ng adlaw kagahapon, Martes, sa pagpadayon sa pagpang-rehestro sa mga botante alang sa eleksyon sa 2016.

Matud ni Mayor Michael Rama nga magbaton og maayo’ng sistema ang Comelec aron dili masakripisyo ang mga tawo nga magparehestro ug ang uban nga nagtinguha nga kahimoan og kausaban ang ilang mga voter’s records.

Si Rama miingon wala siya malipay nga nakakita sa mga tawo nga nagdasok atubangan sa Comelec ug ang uban nagbuwad sa init sa adlaw aron lang dili sila mabuwag sa taas kaayo nga linya.

Ang taga Mandaue nagtuo nga usa lang ka adlaw ang pagpangrehestro mao nga nag-ambahan sila pag-adto sa opisina sa Comelec. Ang pagpangrehestro sa mga botante molungtad pa hangtud sa Oktobre sunod tuig.

Si Cebu City Election Officer Marchel Sarno mibutyag nga abli sila gikan Lunes hangtud sa Biyernes ug sa mata’g Dominggo.

Ang 16 anyos nga motangkod nga 18 sa adlaw sa election unya sa tuig 2016, mahimo na nga magparehistro, ug kadtong mobalhin pagparehistro apil ang magpa-reactivate sa ilang voters records.

Matud ni Comelec-7 Regional Director Timmy Lambino nga andam sila nga moserbisyo bisan lapas sa oras aron lang kaserbisyohan ang publiko.

Giangkon ni Lambino nga nagkulang gihapon ang mga computers sa Comelec aron unta magamit ug mapadali ang ilang gimbuhaton.

Kadtong mga botante nga wala pa’y ID apan nakabotar sa miaging eleksyon ug may hulagway na sa Book of Voters dili na kinahanglan nga magparehestro pag-usab.

Ang Republic Act 10367 naglatid nga ang mga botante kinahanglang adunay biometrics data aron katugotan nga makabotar sa 2016.