Rama, Unya Na Magpa-Drug Test

Ang tanang elected nga opisyal sa dakbayan sa Sugbo, gawas lang ni Mayor Michael Rama, gihimoan og kinalit nga drug test aron pagsuta kinsa kanila ang mogamit og gidili nga matang sa drugas.

Ang mga sakop ni Dr. Alice Utlang, hepe sa City Office for Substance-Abuse Prevention (COSAP), sayo kaayo nga miabut didto sa City Council atul nga ang mga konsehal naghimo sa nilang sesyon.

Matud ni Dr. Utlang nga ang ilang gihimo mao ra ang pagtuman sa awhag sa mga sakop sa City Council nga ang tanang mga pinili nga opisyal apilon sa pag-drugtest.

Tagsa-tagsa nga nanggawas ang mga konsehal gikan sa session hall og miadto sa pansayan diin didto nagpaabot ang mga laboratory technicians nga gi-hire ni Utlang.

Si Konsehal Mary Ann delos Santos didto na makuhai og urine sample sa iyang opisina tungod kay wala kini makaihi didto sa pansayan sa session hall.

Matud ni Utlang nga ang initial results sa drugtest nagpakita nga walay bisan usa nga napositibo sa gidiling drugas, apil na si Vice Mayor Edgardo Labella.

Si Dr. Utlang miadto usab sa opisina ni Mayor Michael Rama aron unta kuhaan og drugtest ang mayor, apan si Rama wala mohatag og urine sample.

Gi-lecture ni Rama si Dr. Utlang nga kinahanglang tahuron ang katungod sa mga kawani sama nga ang mga permanent employees imbistigahon gayud kon mapositibo.

Si Rama mitataw nga supak siya nga ang tanang 5,000 ka kawani sa lainlaing departamento sa dakbayan sa Sugbo ang himoan og drugtest kay magkahulogan kini og daku kaayo nga kantidad.

Ang matag usa ka drug testing kit nagkantidad og P300 mao nga matud sa mayor daku kaayo ang magasto kon hutdon ang 5,000 ka kawani, mao nga ang gusto niya mao ang “random drug test.”

Matud ni Rama nga magpa-drug test siya kon human na ang paghimo sa drug testing sa mga kawani nga gikatahapan nga tiggamitan og gidiling matang sa drugas.