Rama, Osmeña Giimbitar sa Away Ni Pacman sa Macau

Silang duha si Cebu City Mayor Michael Rama ug kanhi Kongresista Tomas R. Osmeña pareho nga giimbitar ni Manny Pacquiao aron patambongon sa iyang away batok sa boksingero nga si Brandon Rios adto sa Macau, China karong Nobyembre 24.

Matud ni Tommy nga giimbitar siya ni Pacquiao nga suod niyang higala nga pasaksihon sa iyang away ngadto sa Macau, apan si Rama miingon nga apil siya nga giimbitar usab sa Filipino boxing hero nga paadtoon sa Macau aron mosaksi sa iyang away.

Si Rama miingon nga dili niya igsapayan nga pareho sila nga giimbitar ni Pacquiao basta dili lang sila magtupad sa paglingkud ug si Tommy nga maoy higpit niya nga kontra sa politika.

Samtang giangkon na gayud ni Mayor Rama nga nasakitan kaayo siya dihang ang iyang higala nga si Pacquiao nagpakuha’g hulagway nga nagpakita nga didto kini misuporta ni Osmeña sa eleksyon kaniadtong Mayo.

Matud ni Rama nga personal g’yud niya nga gitug-anan si Pacquiao sa iyang gihambin nga kahiubos dihang nagkasultihanay sila atul nga giimbitar sa Filipino boxing hero si Rama nga patan-awon sa iyang away batok ni Brandon Rios adto sa Macau, China karong Nobyembre 24.

Atubangan sa mga City Hall reporters giangkon ni Rama nga gitug-anan g’yud niya si Pacquiao nga nasakitan g’yud siya kaayo dihang si Pacquiao nagpakuha’g hulagway nga nagsul-ob og T-shirt nga iya sa Bando Osmeña Pundok Kauswagan (BOPK).

Ang maong paid-advertisement naghulagway sa tawo nga nagtalikud og may marka ang buko-buko nga nagsuporta ni Rama. Daghan ang maikag paghuna-huna kon si kinsa ang maong tawo nga walay ngalan sa hulagway. Sa likud nga bahin sa mao nga pahina sa mantalaan adto na makita nga ang tawo nga nagtalikud mao diay si Pacquiao nga nag-atubang na sa mao nga hulagway.

Matud ni Rama nga suod usab niya nga higala si Pacquiao ilabi na dihang managkauban pa sila si Tommy kaniadto sa BOPK.

Si Rama miingon nga bisan og nasakitan siya sa mao nga pagsuporta ni Pacquiao kang Tommy apan iya kini nga giingnan nga ipatigbabaw niya ang pagka nasyonalismo og mao nga tambongan niya ang iyang away batok ni Rios.