Rama Ngadto sa mga Brgy. Kapitan: Putlon ang Pagdumot

Si Cebu City Vice Mayor Edgardo Labella nakabantay g’yud nga daghan pa gihapon nga mga kapitan sa barangay nga padayon’g nagdumot ngadto sa ilang mga lumulopyo nga wala mobutar kanila kaniadtong miaging eleksyon.

Matud ni Labella nga daghan kaayo ang moreklamo didto sa iyang opisina nga adunay mga kapitan sa barangay nga dili patas nga mohatag og serbisyo ngadto sa ilang mga lumulopyo, ilabi na og klaro kaayo sila nga didto misuporta sa kaatbang niini.

Atol sa tigum sa mga sakop sa Association of Barangay Councils (ABC) kaniadtong Biyernes, ang mga kapitan sa kabarangayan sa dakbayan sa Sugbo giawhag nila ni Mayor Michael Rama ug ubang opisyal nga putlon na ang pagkamadinumtanon ngadto sa mga tawo nga didto modapig sa ilang mga kontra sa miaging eleksyon.

Pareho ang awhag nila ni Rama ug Vice Mayor Edgardo Labella kinsa mihimo usab og diskurso atubangan sa mga kapitan sa barangay kay matud ni Labella daghan g’yud ang mireklamo nga adunay mga kapitan nga dili patas ang ilang pagtagad.

Gipahinumdoman ni Labella ang mga kapitan sa barangay kabahin sa lagda sa Code of Conduct and Ethical Standards for Public Officials and Employees nga mahimo sila nga masilotan kun pilion lang ang serbisyohan.

Si Rama miingon nga human na ang eleksyon ug angay’ng kalimtan ang mga panagbingkil tungod kay managlahi ang gisuportahan nila nga mga kandidato.

Samtang si Tisa Barangay Captain Philip Zafra, presidente sa Association of Barangay Councils (ABC), miawhag og kahiusahan ug panag-uli sa tanang kapitan sa kabarangayan.

Giluwatan ni Zafra ang awhag tungod kay sigurado siya nga adunay mga kapitan nga dili makadawat nga siya maoy midaug pagka presidente sa eleksyon sa mga opisyal sa ABC.