Rama Ngadto sa DPWH, Contractor: S. Osmeña Ave. Butangan og Aseras, Kahoy

Ang mga opisyal sa Department of Public Works and Highways (DPWH) ug WT Construction gimandoan ni Mayor Michael Rama nga butangan nila pagbalik og center-island ang taliwala sa Serging Osmeña Avenue ug tamnan gihapon kini og mga kahoy.

Gihimo ni Rama ang kamandoan diha nga nakigtagbo kaniya didto sa City Hall ang mga opisyal sa DPWH ug sa WT Construction aron paghisgot sa pagpangibot sa dul-an sa 100 ka kahoy gikan sa gisemento nga karsada sa North Reclamation Area.

Gitahasan usab sa mayor ang DPWH nga maghimo sila og sidewalk sa masig ka kilid sa Serging Osmeña Avenue.

Gipasabot ni Rama ngadto sa iyang mga bisita gikan sa DPWH ug WT Construction ang kamahinungdanon sa center island isip division sa usa ka lapad nga karsada ug ang importansya sa mga kahoy, apil na ang sidewalk.

Matud sa mayor nga giingnan niya ang iyang mga bisita nga ngil-ad kaayo tan-awon nga samtang ang dakbayan adunay lapad nga karsada apan bati kaayo ang aseras.

Si Rama miingon nga ang kagamhanan wala magmugna og dakbayan alang ra sa mga sakyanan kun dili usa ka matahom nga siyudad nga maanindot ang sidewalk nga adunay mga kahoy.

Ang WT Construction mipasalig ni Rama nga ilang tumanon ang giawhag sa mayor bisan pa man og gipasakaan na sila og kaso sa kadagkoan sa Department of Environment and Natural Resources (DENR).

Giawhag usab sa mayor ang DPWH nga palapdan ang taytayan sa mga sapa nga anaa molagbas sa Serging Osmeña Avenue nga kanhi MacArthur Boulevard.

Ang taga DWPH nagkanayon nga paspasan nila ang pagsemento sa Serging Osmeña Avenue aron mahuman kini sa dili pa ang pagpahigayon sa Asia-Pacific Economic Cooperation (APEC) summit sa 2015 ug International Eucharistic Congress sa 2016.