Rama Nangayo’g Pasaylo sa Paghatag og Ipad

Nangayo’g pasaylo si Mayor Michael Rama tungod sa kontrobersiya nga namugna sa iyang hukom nga panghatagan og iPad Air electronics gadget ang tanang department heads ug pipila ka division chief sa City Hall.

Gitataw hinoon ni Mayor Rama nga bisan og daghan ang nanaway sa iyang lakang apan ipadayon g’yud nila ang mao nga kalihukan kay gitumong kini nga mapalambo ang serbisyo sa mga opisyal.

Gusto ni Rama nga kun adunay mahinungdanong memorandum nga angay’ng mabasa dayon sa mga department heads ila dayon kini nga madawat kay ang iPad Air mahimo man nila nga madala-dala.

Ang tanang 22 ka department head ug assistant city department heads gihitagsaan g’yud og personal computers sa ilang opisina, aduna pa’y mga laptop.

Si City Administrator Lucelle Mercado maoy misugyot niini’ng pagpanghatag og iPad Air sa mga department heads diin ang dakbayan sa Sugbo magbayad og ‘tag P2,000 kada buwan kon P60,000 alang sa 30 ka iPads.

Gikatahong gisaway si Rama kay samtang nagsigi kini og pangayo’g donasyon “Piso Mo, Hospital Ko” aron makatukod pagbalik og bag-ong ospital sa dakbayan, migasto kini alang sa wala na kaayo kinahanglana nga kahimanan.