Rama Nagpa-Drug Test Na

Si Mayor Michael Rama nagpa-drugtest na g’yud atul sa panagtigum sa mga sakop sa City Office for Substance Abuse Prevention (COSAP) didto sa conference room sa opisina sa bise mayor karong adlawa, Huwebes.

Personal nga miadto si Mayor Rama sa conference room sa opisina ni Vice Mayor Edgardo Labella, diin didto magtigum ang mga sakop sa COSAP og giawhag siya nga mosumiter og sampol sa iyang ihi.

Sekreto kaayo ang mao nga kalihukan kay si Mayor Rama dili gusto mabutyag sa publiko nga nagpa-drug test na siya.

Adunay nakatug-an sa MetroCebuNews nga ang mayor nagpa- drug test na apan si COSAP executive director Alice Utlang wala dayon mokonpirmar sa kasayuran.

Usa ka tinubdan sa MetroCebuNews ang mihatag sa kasayuran nga si Mayor Rama nagpa-drug test atul sa tigum sa mga sakop sa COSAP, pipila ka gutlo human kini mihimo og press conference.

Sa press conference, si Mayor Rama gitug-anan sa mga reporters nga daghan sa katawhan wala makauyon sa iyang lakang nga nagpadiki-diki sa pagpa-drug test dihang giadto sa mga sakop sa COSAP sa iyang opisina kaniadtong Miyerkoles.

Ang mayor mihatag og salabtonon nga pamahayag nga naghatag og ideya sa mga media nga siya nagtinguha na nga magpa-drug test. Si Dr. Utlang mapanagan-on nga mohatag og inpormasyon.

Si Utlang miingon nga lahi sa nangaging mga drug test nga ipahibalo nila kon adunay mapositibo sa drug test bisan og walay ngalan, apan karon ilang tumanon ang confidentiality sa resulta sa drug test.

Wala gani mobutyag si Utlang kon unsay resulta sa drug test ni Mayor Rama, apan ang mayor atul sa press conference miingon nga wala g’yuy drugas nga nasulod sa iyang lawas.

Ang tanan nga konsehal nagpa-drug test na kaniadtong Miyerkoles. May mitumaw hinoon nga isyu kay dunay mga konsehal nga nagduda sa resulta sa drug test ni Konsehal Mary Ann Delos Santos.

Nahibaw-an nga si Delos Santos nagpakuyog og babaye nga iyang office staff pagsulod niya sa pansayan nga nagkuha og “urine sample.” Dunay nagduda nga basin ang ihi nga gisumitir nga himoan og drugtest dili iya ni Konsehal Delos Santos.

Apan si Delos Santos miingon nga dili siya “buang” nga dauton ang iyang lawas pinaagi sa paggamit og gidili nga matang sa drugas. Iyang gipasabot nga ang iyang staff gipauban niya aron mogunit sa iyang sinena.