Rama Mipasigarbo sa mga Proyekto ug Tingoha atol sa SOCA

Milungtad og kapin sa oras ang pagdiskurso ni Mayor Michael Rama sa tinuig niya nga State of the City Address (SOCA) nga gipahigayon sa unang higayon atubangan sa mga konsehal sa dakbayan sa Sugbo atul sa regular nga sesyon kaganihang buntag.

Sa wala pa modiskurso si Mayor Rama, si Monsenyor Roberto “Boy” Alesna mihimo og “invocation” diin nagpahinumdom sa mga opisyal sa dakbayan nga ayuhon ang ilang trabaho pagserbisyo sa katawhan ug dili gamiton ang ilang gahom sa personal nga katuyoan.

Gibatbat sa mayor ang iyang mga proyekto nga gipasiugdahan sa milabay’ng usa ka tuig ug sa mga giplano pa nga iyang
ipatuman sa laing duha pa ka tuig sa iyang termino.

Apil sa mga proyekto nga gipasigarbo ni Rama mao ang pagsugod na niya pagpatuman sa “three-meter easement” sa kasapaan, ingon man ang pagpahigayon og reblocking sa mga siot nga residential areas.

Matud ni Rama nga sa miagi’ng tuig ang kagamhanan sa dakbayan nakapatuman og P250 milyones nga kantidad sa drainage projects ug nakapasemento kini og daghang karsada nga gigastohan og P183 milyones ug daghan usab ang gipang-aspalto nga migasto og P265 milyones.

Gipasigarbo ni Rama ang iyang nahimo nga paghawan sa gubot kaayo nga Warwick Barracks nga karon gihimo na nga temporary parking area sa mga sakyanan sa mangomprahay sa Carbon market.

Gipahibalo ni Rama nga iyang tinguha’ng itanyag sa mga pribado’ng sektor ang Freedom Park market ug Warwick Barracks nga kahimoan og Joint Venture project aron mosamot pa gayud paglambo ang mao nga dapit.

Samtang gimandoan ni Rama ang Metro Cebu Water District (MCWD) nga panguhaon ang ilang mga water meters nga anaa nakababag sa aseras ug nakahatag og peligro sa mga tawo.

Gisaad usab sa mayor nga magpatukod siya og daghang public toilets aron magamit niadtong mga pamilya nga wala pa’y
kaugalingon nga pansayan.

Si Rama hinuon miawhag ug tabang gikan sa mga sakop sa konseho ug sa mga opisyal sa kabarangayan. Giangkon sa mayor nga kun ang mga konsehal dili moabag kaniya dili siya magpalampuson sa iyang mga damgo.

Bisan og limitado lang ang mga tawo nga gipasulod didto sa session hall, apan ang daghang mga tawo nakasaksi ra gihapon sa proceedings kay dako kaayo nga screen ang giabangan sa dakbayan og gipahiluna atubangan sa Plaza Sugbo nga gipakatapan og daghang lingkoranan.

Si Vice Mayor Edgardo Labella midayeg sa matinud-anong mensahe sa mayor nga matud niya gibasi sa dukomento, apan si Konsehal Margot Osmeña ug Konsehal Sisinio Andales, mga sakop sa Bando Osmeña Pundok-Kauswagan (BOPK) wala makontento. Matud ni Andales nga wala modiskutir si Rama sa mga isyu nga gituki sa Commission on Audit (COA) sa iyang mga financial transactions sa miaging tuig.