Rama: Minusan ang Pamulitika, Ipadayun ang Serbisyo

Gipamatud-an ni re-elected Cebu City Mayor Michael Lopez Rama ang iyang katakus sa pagpangalagad sa katawhan nga walay gipili, kaatbang man o kauban.

Matod pa sa Mayor, atol sa iyang pagtambong sa ika-68 nga Anibersaryo sa Filipino Crusaders World Army kon FCWA sa milabay’ng  Hulyo 3, 2013 didto sa Moncado Colony, Barangay Sudlon 2, ning syudad nga: “Bisan pildi ko sa Sudlon 2 sa miaging piniliay niadtong Mayo 13, gaan akong dughan sa pag-anhi diri kay apil mo sa akong atimanon, atong minusan ang pamulitika ug ipadayon ang serbisyo.”

“Gikan sa kinailadman sa akong dughan, congratulations sa inyong 68th Anniversary ug salamat sa inyong pag-imbitar kanako. Ayaw mo kabalaka kay ang kabukiran dili nako pasagdan, akong ipadayon ang pagpasemento sa mga kadalanan, akong ipatigbabaw ang mga mag-uuma, ug atimanon ang mga Senior Citizens ug Persons With Disabilities, ” dugang ni Mayor Rama.

Kahinumduman usab nga niadtong Pebrero 19, 2013 pormal nga gi-turn-over ni Mayor Rama uban sa abag sa Aboitiz Foundation Incorporated ang Water System Projects alang sa Barangay Sudlon 2, uban sa mga Barangay Pong-ol, Sibugay ug Guba nga nakabenepisyo ug dul-an sa 2,600 ka mga pamilya.

Sa iyang bahin, si kanhi Barangay Kapitan Jessie Jayme miawhag sa mga katawhan nga, “Maghugpong ta ug tabangan nato ang atong administrasyon nga gidala ni Mayor Mike Rama sa iyang ikaduhang termino.” Dugang pa, gibatbat usab ninii nga mikabat na ug 36 Milyones ka pesos ang nahatag sa dakbayan sa unang termino ni Mayor Rama ngadto sa ilang barangay.

Samtang ang FCWA giilang grupo sa mga katawhang sumusunod ni kanhi Dr. Hilario Camino Moncado nga nakabasi sa Moncado Colony sa Sudlon 2 ning dakbayan. Ang FCWA namugna niadtong Hulyo 3, 1945 ug aduna usab silay mga miyembro ug sumusunod nga anaa na namuyo sa nagkalain-laing lugar sa Pilipinas. (Ni: Greggy Jiggs P. Senados, PIO Staff)