Rama Mimando Pagpatiwas sa ‘Clearing Operation’ sa Brgy Ermita

Gimando ni Mayor Michael Rama nga tiwason og paspasan ang paghawan ug pagpatag sa nasunog nga bahin sa Sitio Bato, Ermita nga hangtud karon wala pa gayud mahuman.

Nahibaw-an sa mayor nga adunay mga pamilya nga wala gayud mobiya sa ilang nasunog nga balay diha sa Sitio Bato ug mihinay-hinay na hinoon pagtukod pagbalik sa ilang balay diha gihapon sa nasunogan.

Matud ni Market Administrator Raquel Arce nga ang wala pagbiya sa maong mga pamilya sa dapit nga nasunogan sa ilang mga balay maoy nakapalangay
sa pagpahigayon nila og “clearing operation.”

Gipatag na sa mga City Hall personnel gamit ang usa ka payloader ang dapit nga nahimutangan sa panimalay sa mga biktima sa sunog kaniadtong Abril 21, apan wala pa napatag ang ubang balay nga wala gayud biyai sa ilang mga tag-iya.

Si City Engineer Kenneth Carmelita Enriquez nga maoy hepe sa Office of the Building Officials (OBO) namahayag nga peligro ang gihimo sa mao nga mga lumulopyo kay ang building nga masunog dili na lig-on og posible nga mahugno.

Gusto ni Mayor Rama nga human mapatag sa mga sakop sa clearing team ang tibuok nasunogan, ang mga technical personnel mohimo dayon og pagbahin-bahin sa tibuok dapit aron kabutangan usab og karsada nga kaagian sa mga bombero kon may sunog nga moulbo sa maong lugar.

Daghan ang misupak sa pagpahigayon og reblocking sa dapit nga nasunogan kay mahadlok nga maibanan ang gidak-on sa ilang mga pwesto.