Rama Mikwestyun sa Paghulip Kang Romana

Gireklamo ni Mayor Michael Rama ang gihimo sa kadagkoan sa Camp Crame nga kalit kaayo’ng pagrelyibo sa katungdanan ni Cebu City Police Office (CCPO) director Noli Romana.

Nagtuo si Rama nga aduna g’yuy mga kamot nga naglihok aron matangtang ang opisyal nga napilian niya nga maoy direktor sa kapolisan dinhi sa dakbayan.

Wala hinuon ibutyag sa mayor ang iyang gikatahapan nga maoy nagpaluyo nga marelibohan si Romana sa iyang katungdanan.

Nasayran ni Rama nga wala diay magtinguha si Romana nga mabalhin sa Camp Crame. Si Rama nagkahinabi ug si PNP Chief Alan Purisima ug iyang gipadayag ang iyang kahiubos sa kalit ra nga paghulip ni Romana sa katungdanan.

Matud ni Rama nga nahiubos kaayo siya nga gikalit lang pagrelibo sa Camp Crame si Romana nga wala gani mopahibalo kaniya isip maoy mayor dinhi sa dakbayan.

Si Rama nagkanayon nga giingnan siya ni Purisima nagtuo sila sa Camp Crame nga may koordinasyon na sa City Hall ang pagbalhin ni Romana ngadto sa kaulohan.

Gipasabot ni Rama nga isip siya maoy mayor sa dakbayan angay g’yud unta nga pahibaw-on siya kun may plano ang Camp Crame nga hulipan ang iyang hepe sa kapolisan.

Ang mayor miingon nga naigo siya sa “strike two” tungod sa pagrelibo ni Romana kay ang “strike one” mao man ang paghulip usab sa katungdanan ni Senior Superintendent Melvin Ramon Buenafe.