Rama: Makaayo sa Publiko ang Kompetisyon sa Negosyo

Si Mayor Michael Rama mihulagway nga ang pagmugna og bag-o nga dakong tindahan sa dalan Colon magsilbi nga hagit sa ubang magpapatigayon nga kinahanglang makig-indig sila pagpalambo sa ilang negosyo aron dili sila biyaan sa ilang kustomer.

Ang pamahayag ni Mayor Rama iyang giluwatan human siya mihatag og pakigpulong atol sa pagbukas sa bag-ong Super Metro Colon kagahapon nga klaro kaayo nga nakapabalaka sa mga kanait nga tindahan nga hayan mabiyaan sa ilang kustomer.

Nabantayan sa mga reporters nga ang atbang nga tindahan mibutang og “loud speakers” nga nagpahibalo sa publiko kabahin sa “promotions” sa ilang produkto nga wala nila kini himoa sa wala pa mobukas ang bag-ong tindahan.

Matud ni Mayor Rama nga makaayo sa publiko ang kompetisyon tungod kay makapabarato kini sa mga presyo sa lainlaing baligya og mapugos usab ang ubang tag-iya’g tindahan nga mopanindot sa ilang balay-patigayon.

Gipasalig usab sa mayor nga iyang pakigtagboan ang mga sakop sa Downtown Revitalization Project aron pangayoan og mga maayo nga sugyot unsaon nga mobalik ang pagka-alegre sa downtown area.

Gisaad usab ni Rama nga ipalihok niya sa Department of Engineering and Public Works (DEPW) ang paghatag g’yud og sulbad sa kanunay’ng paglunop sa Colon.

Ang kanunay’ng paglunop sa downtown area nakapugos sa mga tag-iya og balay-patigayon nga patas-an ang aseras atubangan sa ilang tindahan aron nga dili sila masudlan sa tubig.

Photo above: Opening of Super Metro Colon located along corner Junquera and Colon Streets in the downtown area of Cebu City. (Credit: Cebu City PIO)