Rama: Halin sa SRP, Dili Hutdon Pagbayad sa Utang

Si Mayor Michael Rama mitataw nga kon makahalin man siya og yuta sa South Road Properties (SRP) dili niya kini hutdon dayon og gasto pagbayad sa utang didto sa Japan.

Ang pamahayag ni Rama iyang giluwatan human nga si Konsehal Noel Eleuterio Wenceslao miingon nga kinahanglang unahon sa mayor ang pagbayad sa utang.

Si Wenceslao usa sa upat ka konsehal nga alyado sa Bando Osmeña Pundok Kauswagan (BOPK) nga misuporta nga si Mayor Rama tugotan nga makabaligya og yuta sa SRP.

Matud ni Wenceslao nga angay’ng unahon gayud ni Rama ang pagbayad sa utang sa dakbayan sa Japan Bank for International Cooperation (JBIC) kabahin sa pag-ugmad sa South Reclamation Project nga karon gitawag na og South Road Properties.

Base sa rekord, ang dakbayan sa Sugbo utangan pa gihapon og kapin sa P3 Bilyones sa Japan bisan og miabot na og kapin sa P6 Bilyones ang nabayad sa City Hall ngadto sa JBIC.

Si Rama miingon nga kon mahalinan siya og kayutaan sa SRP dili niya hutdon pagbayad sa JBIC kay nabalaka siya nga basin kon adunay mahinungdanong gastohanan sa dakbayan.

Sa 295 hektareyas nga kayutaan sa SRP, dul-an sa 200 hektareyas pa ang wala pa mangahalin ug kon kini mahalin gibana-bana nga mokantidad kini og bilyon-bilyon ka pesos.

Image Credit: www.inewmedia.org