Rama Gustong Mahimong ‘National Pride’ si Pacquiao

Gusto unta ni Mayor Michael Rama nga si boxing champ Manny Pacquiao madeklarar isip usa sa mga National Pride of the Philippines tungod sa dako’ng dungog nga iyang nahatag sa nasud sa natad sa pamoksing.

Wala g’yud hinuon motataw si Mayor Rama kun suwatan ba niya si Presidente Aquino aron nga makatabang sa pagpadali sa katumanan sa iyang tinguha.

Matud ni Rama nga kinahanglan nga mahimo’ng National Pride si Pacquiao tungod kay nahimo’ng inila ang Pilipinas sa ubang bahin sa kalibutan tungod kaniya.

Bisan tuod og gideklarar nga pilde si Pacquiao sa ilang away ni Floyd Mayweather kaniadto’ng Domingo, apan ang mao nga kumbati ibabaw sa ring gitutokan sa minilyon ka katawhan sa tibuok kalibutan.

Tinguha ni Rama nga si Bise Mayor Edgardo Labella makahimo usab og lakang aron ang Cebu City Council makahimo og rekomendasyon sa pagsukip sa ngalan ni Pacquiao sa National Pride of the Philippines.

Daghan kaayo nga mga tawo nga nakahimo og talagsaong kalihukan, sama ni Gabriela Silang ug uban pa nga nalakip sa listahan sa mga nasudnong garbo sa Pilipinas.