Rama: Gihimakak nga Pamolitika ang Dugang Honoraryom

Dagku kaayo’g pahiyom ang mga opisyal sa lainlaing barangay dinhi sa dakbayan sa Sugbo kagahapon kay gipanghatagan na usab sila og dugang honoraryom nga gikan sa Cebu City Hall.

Kining gihatag nga City Hall honoraryom sa matag opisyal sa 80 ka barangay sa dakbayan sa Sugbo dugang kini nila nga gidawat walay labot sa binuwan nila nga honoraryom gikan sa ilang mga barangay.

Ang matag kapitan sa barangay dinhi sa dakbayan adunay tag P5,000 nga dugang honoraryom gikan sa City Hall matag buwan samtang tag P3,000 ang dawaton ‘sab sa matag konsehal.

Si Mayor Michael Rama miingon nga bali’g unom ka buwan nga honoraryom ang gidungan nila paghatag sa mga opisyal kagahapong adlawa diin didto gihimo sa Waterfront Hotel.

Ang mga kapitan makadawat unta og tag P30,000 apan giibanan og P3,000 nga withholding tax, samtang ang P18,000 nga alang unta sa mga konsehal sa barangay giibanan usab og P1,800.

Si Mayor Rama nanghimakak nga pamolitika ang iyang gihimo sa paghatag og dugang honoraryom sa mga opisyal sa barangay.

Dunay nakabantay nga si Rama mi-release sa dugang honoraryom sa mga opisyal sa barangay dihang nagsingabot ang eleksyon sa miaging Mayo, ug karon ‘sab nga nagsingabot ang eleksyon sa barangay.

Samtang subsob nga gipanghatag ang dugang honoraryom sa mga opisyal sa barangay, apil gani ang barangay treasurer ug secretary, ang kagamhanan sa dakbayan napakyas paghatag sa taud-taud na nga higayon sa school supply allowance sa mga city scholars.