Rama Dili Molaban sa SWAT nga Gisumbong nga Nanion og Armas

Dili molaban si Mayor Michael Rama niadtong sakop sa PNP Special Weapon and Tactics (SWAT) nga gipasanginlan nga mition og armas ngadto sa mga opisyal sa Masbate.

Tungod niini, daghang mga polis ang nahiubos ni Mayor Rama kay si SPO1 Arthur Sabang gidistino aron mosiguro nga walay makasulod sa Cebu City Sports Center nga walay labot ug dili apil sa dancing contingents.

Ang grupo nila ni Gobernador Rizalina Seachon Lañete diha magpundok sa ganghaan nga bahin sa Sports Center ug nagpaabot sa pagsulod sa mga dancing contingents sa Placer, Masbate aron sila mokuyog sa pagsulod.

Nangasuko ang grupo nila ni Lañete diha nga gibabagan sa grupo nila ni SPO1 Sabang. Matud sa polis nga igo ra niya’ng giiwagan sa iyang flashlight ang grupo nila ni Lañete nga didto nagpahimutang sa ngitngit nga bahin ug wala pa niya hiilhi adto’ng higayona.

Nahibaw-an nga ang flashlight ni SPO1 Sabang anaa gipapilit sa sumbohan sa iyang M16 Armalite rifle mao nga sa pag-iwag niya kanila ni Gobernador Lañete nagtuo ang gobernador nga gipangtionan sila og armas.

Matud ni Mayor Rama nga kinahanglang imbestigahon pag-ayo kini’ng mao nga isyu ug dili siya molaban sa polis bisan og ania pa madistino sa dakbayan.