Rama Angay’ng Mopasalamat Ni Tommy

Note: Rene U. Borromeo’s personal views also appeared in The Freeman Newspaper on March 17, 2014

Nahibulong ako kun ngano nga gibaligya man sa mga opisyal sa City Hall ang yuta sa dakbayan sa Sugbo nga anaa mahimutang kilid sa “main entrance” sa Waterfront Cebu Hotel & Casino nga walay pagtugot sa City Council.

Giangkon ni City Treasurer Diwa Cuevas nga nakadawat na gani sila og pasiuna nga bayad gikan sa Hotel Asia Inc. nga nagkantidad og P37.5 milyones alang sa 2,357-quare meters nga yuta sa dakbayan.

Wala pa man hatagi og pagtugot sa City Council si Mayor Rama nga makapirma kini og kasabotan uban sa kadagkoan sa Hotel Asia alang sa pagbaligya sa mao nga yuta.

Pagka dako nga problema niini karon kay mireklamo ang Waterfront Hotel kun ngano nga nabaligya ang yuta nga wala sila pahibaw-a.

Kaniadto pa nga miingon ko nga dili maglisod ang City Hall pagbaligya nianang mao nga yuta kay interesado g’yud niini ang Waterfront.

Adunay lagda nga gilatid ang Civil Code of the Philippines nga kun mobaligya ka gani og yuta o balay, angay’ng unahon nimo pagpahibalo ang tag-iya sa kanait nga property.

Ang balaod naglatid nga bisan pa og nahalin na ang mao nga yuta, ang tag-iya sa kanait nga property mahimong mo-contest ug sila ang mopalit sa property base lang sa kantidad nga gikasabotan sa nag-una nga buyer.

Kay P83 milyones man ang pagbaligya sa City Hall sa property sa dakbayan diha kilid sa main entrance sa hotel, aw kini ra usab ang
kantidad nga ibayad sa Waterfront.

Mao kini ang rason nga kun mobaligya ka gani og property, tanyagi pag-una ang tag-iya sa kasikbit nga property. Ang pagpahigayon gud og bidding, dili man mahibaw-an sa tanan.

Ang balaod nga gilatid sa Civil Code, makapa-alkanse kini niadtong mga tawo nga kusog kaayo mopagamay sa presyo sa pagpalit nila sa property aron gamay ra sila’g mabayran nga Capital Gains Tax.

Kun ang tag-iya sa kasikbit nga property moinsistir nga sila gayud maoy mopalit, ang ilang bayaran kadto ra’ng kantidad nga nabutang sa kontrata ug ang balaod nag-ingon nga sila maoy adunay katungod pag-angkon sa property.

Mabalaka g’yud ang Waterfront Hotel kay kun ang Hotel Asia magtukod og bisan gamay lang nga hotel diha sa mao nga luna, apektado na sila, masalipdan na ang Waterfront Hotel.

* * *

Angay’ng magpasalamat si Mayor Michael Rama kang kanhi Mayor Tomas Osmeña kay kun wala pa si Tommy, dili mahimong mabaligya ang mao nga yuta.

Gidonar sa Kapitolyo kining mao nga yuta kilid sa main entrance sa Waterfront Hotel. Sa donasyon adunay gibutang nga dili kini mahimong ibaligya o kaha itugyan sa dakbayan sa laing tawo o grupo.

Kay gusto man ni Tommy kaniadto nga ibaylo ang mao nga luna sa yuta nga giukopahan sa Banawa Elementary School, gipaninguha ni Tommy nga makuha ang kondisyon nga dili kini mahimong ibaligya o ibaylo sa dakbayan.

Tuod man, kay suod pa man niadto si Tommy ug kanhi Gobernador Gwen Garcia, giaprobahan sa Cebu Provincial Board nga wad-on na ang conditional donation.

Apan wala madayon ang tinguha ni Tommy pagbaylo sa mao nga property atubangan sa Waterfront Hotel ngadto sa pamilya’ng Gochan kay misupak ang Commission on Audit (COA).

Matud sa COA nga mas mahal ang mao nga kantidad nga gipanag-iya sa dakbayan kay sa yuta sa mga Gochan nga tag-iya sa yuta nga nahimutangan sa Banawa Elementary School.

Ang gitan-aw gud sa COA mao ra man ang kantidad sa duha ka parsela sa yuta. Ang gipanag-iya na sa dakbayan ug ang iya sa mga Gochan.

Wala man huna-hunaa sa mga State Auditors nga kun papahawaon sa mga Gochan ang tunghaang elementarya gikan sa ilang luna unya magtukod og bag-o nga school building, pila kaha ang magasto?

Kinsa kaha ang nakapunto niini? Alang kanako, husto si Tommy nga mihimo unta og sulbad sa problema kay kun palayason lagi sa mga Gochan ang DepEd gikan sa ilang luna, kadako niini nga problema.

Apan kay mahimo na man kini nga mabaligya sa dakbayan ang maong yuta tungod sa paninguha ni Tommy, bisan sa hilom lang angay’ng magpasalamat si Mayor Rama.