Rama: Adunay P1.7 Bilyones ‘Cash’ ang Syudad

Sa iyang State of the City Address (SOCA) kagahapong adlawa, gibatbat ni Mayor Rama ang daghang mga proyekto nga iyang nahimo sa miaging tuig.

Apil sa gibutyag sa mayor ang kuwarta sa dakbayan sa Sugbo nga sa pagka karon, base sa cash flow kaniadtong Hunyo 30, ang City Hall adunay P1.7 Bilyones nga cash sa bangko. Kini walay labot sa mga katigayonan nga iyang nahuptan, matud pa ni Rama.

Ang mga senior citizens nga naminaw kang Rama ug mitan-aw lang sa lapad ug daku nga screen didto sa atubangan sa City Hall, iyang gialam-alaman nga dili mabalaka sa ilang cash assistance.

Apil sa mga proyekto nga gipasigarbo ni Rama mao ang pagsugod na niya pagpatuman sa “three-meter easement” sa kasapaan, nga mao ang paghawan sa daplin sa mga sapa.

Iya hinuon nga giangkon nga daku pa kini kaayo nga gimbuhaton ug nanginahanglan siya sa tabang sa mga opisyal sa kabarangayan.

Ang pagpahigayon og reblocking ni Mayor Rama sa mga siot nga residential areas, sama sa gihimo niya sa mga dapit nga naigo sa sunog, apil sa gipasigarbo sa mayor sa iyang state of the city address.

Matud usab ni Rama nga sa miagi’ng tuig ang kagamhanan sa dakbayan nakapatuman og P250 milyones nga kantidad sa drainage projects, nakapasemento og daghang karsada nga gigastohan og P183 milyones ug daghan usab ang gipang-aspalto nga migasto og P265 milyones.

Iya usab nga ang paghawan sa gubot kaayo nga Warwick Barracks nga karon gihimo na nga temporary parking area sa mga sakyanan sa mga tawo nga mangompra sa Carbon.

Gipahibalo ni Rama nga iyang tinguha’ng itanyag sa mga pribado’ng sektor ang Freedom Park market ug Warwick Barracks aron kahimoan og Joint Venture project sa tumong nga molambo ang mao nga dapit.

Gianunsyo usab ni Rama nga ang CitiCenter Complex iyang pahawanan aron kahimoan kini og housing projects, dili lang kay para sa mga kawani sa City Hall kundili apil na sa ubang mga kabus.

Apil sa iyang gipagarbo pag-ayo mao ang kanunay niya nga gihimo nga City Hall at Your Doorsteps, diin matag buwan ang mga kawani sa City Hall moadto sa kabarangayan aron paghimo og serbisyo.

Bisan og limitado lang ang mga tawo nga gipasulod didto sa session hall, apan ang daghang mga tawo nakasaksi ra gihapon sa proceedings kay dako kaayo nga screen ang giabangan sa dakbayan og gipahiluna atubangan sa Plaza Sugbo nga gipakatapan og daghang lingkoranan.

Si Vice Mayor Edgardo Labella midayeg sa matinud-anong mensahe sa mayor nga matud niya gibasi sa dukomento, apan si Konsehal Margot Osmeña ug Konsehal Sisinio Andales, mga sakop sa Bando Osmeña Pundok-Kauswagan (BOPK) wala makontento.

Matud ni Andales nga wala modiskutir si Rama sa mga isyu nga gituki sa Commission on Audit (COA) sa iyang mga financial transactions sa miaging tuig.

Image Credit: Cebu City PIO