PWD Nahiubos ni Rama

Daghang botante dinhi sa dakbayan nga adunay apan sa ilang panglawas kon Persons with Disabilities (PWD) nahiubos kay gihulagway nila nga gikalimtan sila sa administrasyon ni Mayor Michael Rama samtang gipangga ang mga senior citizens.

Si Nicolas “Kolas” Silot nga usa ka buta og taga Barangay Basak-Pardo miingon nga siya ug ang mga kauban niya nga PWD nahiubos kaayo kay wala gayud sila hatagi bisan og katunga sa ilang cash assistance.

Karong tuiga gi tag P3,000 na ang tinuig nga cash assistance nga ihatag sa matag usa ka PWD dinhi sa dakbayan apan gikan kaniadtong Enero wala pa gayud sila hatagi bisan katunga dili sama sa mga senior nga gihatagan na og tag P4,000.

Tag P10,000 na ang cash assistance nga ihatag sa dakbayan alang sa matag usa ka senior citizens karong tuiga ug gani napahibalo na nga sa Hulyo himoon ang laing pangpanghatag sa tag P2,000 unya sundan sa sama gihapon nga kantidad sa Septiembre ug sa Disyiembre.

Dul-an na sa 60,000 ang tanang senior citizens dinhi sa dakbayan samtang mga 10,000 lang ang PWD nga narehestro sa Department of Social Welfare and Services.

Dili tanan kanila ang makabotar kay ang ubang PWD mga bata pa og kini ang rason nga matud ni Kolas Silot nga wala kaayo sila tagda kay gamay ra ang ilang gidaghanon.

“Gamay ra tuod mi nga PWD apan kon iphon og apil ang among mga sakop sa pamilya daghan na. Diha sila masayup si Mayor Mike nga wala ra mi nila tagda,” matud sa buta nga si Kolas Silot.

Matud ni Kolas Silot nga managsama ang sentimento ang mga PWD nga nagmahay.

Ang argumento sa maong buta nga ang mga opisyal sa barangay adunay honoraryom nga gidawat sa ilang barangay apan bisan pa niini gipauna pa ni Mayor Rama ang paghatag sa ilang honorarium.