News
Pulis Trapiko Nangayu’g Balaod Pag-ibot Sa Saba Nga Tambotso
Gihangyo sa hepe sa kapulisan sa syudad nga abagan sa konseho pinaagi sapaghimog ordinansa nga magtugot sa kapolisan sa pagtangtang sa tambotsong ilegal aron permanente na kining gob-on.
Didto sa City Peace and Order Council Meeting sa milabay nga buwan, nangayog abag si PSupt George Vale sa mga tigpandayg balaod sa syudad dala sa magkadaghang reklamo sa gipauso nga dagkog ilegal nga paghimong kusog ang tingug sa tambotso ug itaud sa mga motor.
Segun sa Traffic Code of the Philippines, ang matag motor nga gipadagan pinaagi sa makinang may internal combustion kinahanglang magtangag sa tambotso, kon kini mosubay sa bisan asang dalan sa lungsod o syudad, o kadtong naay daghang tawo.
Walay ni bisan unsang motor ang padaganon lon kini makahasud pinaagi sa pagbuga og dili kinahanglang aso, baho o wa kinahanglanang gikusgong sa tingug.
Apan sa Tagbilaran, daghang tag-iyahan og motor ang nagpuli sa ilang mga tambotso sa mga dagkog tingug, nga makatugaw sa mga residente ilabi na kon magbahasbahas sa lawom nga kagabhi-on.
Kini karon ang unod sa mga reklamo sa mga nasamokan na sa kabanha niini.
Matud ni Vale, buot sa Kampo Dagohoy nga maghimo og saturation drive alang niining mga salaud, apan, dugang niya, unsaon nga may mga tingdahan o dealerships man nga magbaligya, ug daghang wa masayud nga ang pagpuli og tambutso, ilegal diay.
Bisan pa niini, wala magmakulang ang City Traffic Division sa pagdakop sa mga motor nga ilang masakpang may gipang usab ilabi na sa tambotso.
Hinuon, maud ni Vale, wala silay mahimo kon ang madakpan, mobayad lamang sa multa.
“Dili namo pwede nga hawiran ang motor kon mobayad ang tag-iya sa multa, tungod kay mahimo usab kaming kasuhan,” sumbong sa usa ka pulis.
Karon, aron masolbad kini, mahimong ang pagpasupot og ordinansa nga magtugot sa kapolisan sa pagtangtang sa ilegal nga tambotso aron hingpit na nga di magamit, maoy gitumong ni Supt Vale.
Wala pa usab makakomentaryo ang Sangguniang Panglungsod kabahin niini. (rac/PIA-7/Bohol)
