Public Hearing sa Usbaw sa Pletehan, Gitakda karon Hunyo 24

● Gimando sa kauluhan nga mopahigayon og public hearing aron paminawon ang sentimento sa mga drayber ug sa mga sumasakay.

Karong Hunyo 24 na ipahigayon sa Land Transportation Franchising and Regulatory Board (LTFRB)-7 ang public hearing sa petisyon sa pagpausbaw sa pletehan sa Sugbo.

Matud ni LTFRB Regional Director Ahmed Cuizon nga gimandoan siya sa iyang mga labaw sa Manila nga mopahigayon og public hearing aron paminawon ang sentiment sa mga drayber ug sa mga sumasakay.

Ang kadagkoan sa Cebu Integrated Transport Service Multi-purpose Cooperative (CITRASCO) maoy miawhag nga ang minimum nga pletehan sa mga PUJ himuon na nga P10 gikan sa P7.50. Wala pa hinuon mahibaw-i kun asa nga lugar ipahigayon ang public hearing apan si Cuizon miawhag na’ng daan sa publiko nga motambong kun sila gusto nga mapaminaw ang ilang demanda.

Matud ni Cuizon nga ang resulta sa public hearing ang basehan sa iyang rekomendasyon sa ulohang buhatan sa LTFRB nga maoy mohimo sa hingpit nga desisyon.

Didto sa kaulohan, ang LTFRB miaprobar na og 50 sentimos nga usbaw sa minimum nga pletehan sa mga PUJ sa National Capital Region, Rehiyon 3 ug 4 sugod karong Hunyo 14.

Pagka karon, P7.50 ang minimum nga pletehan sa mga PUJ dinhi sa rehiyon 7, apan daghan sa mga drayber ang miabuso pinaagi sa pagkolekta og P8.

Matud pa sa mga pasahero, daghan sa mga drayber nga dili usab mohatag og 20 porsiento nga diskwento sa mga tinun-an nga maoy gilatid sa lagda sa LTFRB. Ang tukma mao nga P6 lang g’yud unta ang pletehan sa mga tinun-an ug senior citizens.