PSA7 Mo-Hire og 158 ka Data Encoder

Nagkinahanglan ang Philippines Statistics Authority (PSA)7 (kanhi National Statistics Office) og 158 ka mga data encoder alang sa ilang ipahigayon nga “pilot census” sa mga nabiktima sa bagyong Yolanda dinhi sa Sugbo .

Nagkanayon PSA-Cebu provincial statistics officer, Fermo Deputado nga ang maong census sa mga lugar nga gikusokuso sa bagyong Yolanda sa amihanang bahin sa lalawigan sa Sugbo gimando sa Office of the Presidential Assistance on Rehabilitation and Recovery (OPARR) nga gipangulohan ni Sec. Panfilo Lacson.

Midugang si Deputado nga ipahigayon ang maong census sa buwan sa Agusto ning tuig 2014.

Lakip sa maong census ang lungsod sa Madridejos, Sta. Fe ug Bantayan sa Bantayan Island, Daanbantayan ug San Remigio, ingon man sa syudad sa Bogo.

Gibutyag usab ni Deputado nga ang labing importanting kuhaon nga data gikan sa mga typhoon survivors mao ang livelihood ug housing sites niini sa wala pa, ug ingon man sa pagkahuman sa bagyong Yolanda.

Ilakip usab pagpanglista ang bahin sa hitsura sa balay, garbage disposal, tinubdan sa supply sa tubig ug uban pa.

Midugang si Deputado nga prayoridad nilang dawaton nga aplikante isip data encoder mao ang mga aplikante nga nakaabot na sa second year college gikan mismo sa mga lugar nga apektado sa bagyo.

Midugang siya nga ang kalipikado ug madawat nga data encoder may suweldo nga P289 matag adlaw, gikan sa Agosto 4 hangtud sa Agosto 30 ning tuiga.

Miingon usab si Deputado nga ang PSA migahin og P 2 milyones alang sa maong proyekto nga pilot census dinhi sa Sugbo.

Human sa survey, ang data nga makuha sa mga data encoder ihandos dayon ngadto sa buhatan sa OPARR sa dili pa matapos ang tuig.

Giawhag usab ni Deputado ang tanang mga molupyo nga mo-kooperar sa mga data encoder pinaagi sa paghatag og hustong tubag sa mga ipangutana niini.

Iyang gipasindan-an ang tanan nga mag-atubang sila og silot pinaagi sa multa nga P10 mil sa higayong masakpan sila nga magdumili sa pakigsandurot sa mga data encoder.

Gibase ni Deputado sa bag-ong balaod ang iyang pasidaan.

Image Credit: pbd.lbl.gov