Processo sa Pag-Blotter og Kaso, Gi-Amendahan sa Kapolisan

Gikuha na gikan sa poder sa Admin, Records, Investigation Division ug uban pang staff offices sa Philippine National Police (PNP) ang pagsulat sa blotter.

Matud pa ni Elvira C. Bongosa,sa Philippine Information Agency(PIA)7, nga ang direktiba naggikan mismo kang PNP Chief Gen. Alan Purisima human sa kwestiyonableng paggunit sa kaso giingong attempted rape kang Denise Cornejo ug pagkulata sa aktor nga si Vhong Navarro sa Police Investigation Division sa Southern Police District.

Midugang si Bongosa nga nakalatid sa direktiba nga sa mga presinto o operational units ug offices lamang ang mahimong modawat og mga reklamo.

Sa samang higayon, miingon si Bongosa nga may mga gihatag nga pahinumdom usab ang PNP sa mga magpa-blotter.

Una, dili mahimong balibaran ug kinahanglang dawaton sa mga polis sa presinto ang reklamo sa usa ka indibidwal o grupo.

Ikaduha, may katungod ang nagreklamo nga isulti sa polis ang tanang detalye sa panghitabo kun, diin , kanus-a ug kun unsa ang hinungdan sa reklamo.

Ikatulo, kinahanglang may diha-dihang aksiyon ilabi na kun adunay panginahanglan nga dakpon ang usa ka gi-reklamo sama sa pagpangulata.

Ika-upat, kun ang usa ka suspek nadakpan tungod sa citizen’s arrest ug nakulatahan na kini, obligado ang otoridad nga ipa-medical exam kini.

Nagkanayon si Bongosa nga labaw sa tanan, kun magpa-blotter, kinahanglang kini himuon sa labing duol nga presinto.