PRO-7: NegOr, Ideklarar nga “Conflict Manageable and Development Ready”

Gibati og kahinangop ang hepe sa Police Regional Office (PRO) – 7 sa nasayran niini nga kaugmaran sa kalinaw sa lalawigan sa Negros Oriental.

Nangandam na si P/CSupt. Danilo Constantino aron mosaksi sa bag-ong deklarasyon sa kalinaw sa maong lalawigan.

Ang Negros Oriental usa sa upat ka lalawigan sa rehiyon 7 nga gidumala sa PRO-7.

Tambongan ni P/CSupt. Constantino ang pagdeklarar nga “Conflict-Manageable and Development Ready” ang maong probinsya karong umaabot nga Abril 28 didto sa Perdices Memorial Coliseum sa dakbayan sa Dumaguete.

Sumala pa sa Deputy Commander sa 302nd Infantry Brigade, Philippine Army nga si Col. Christopher Estella ang padayon nga Oplan Bayanihan ug military combat operations maoy nakapaluya sa pwersa sa New People’s Army(NPA) ug nakapaaghat sa ubang sakop niini pagtahan sa sabakan sa balaod pinaagi sa programa sa gobyerno nga andam modawat ug motabang
kanila.

Dili pa dugay napusilan-patay sa mga sundawo sa army ang duha ka sakop sa NPA,ug nasikop usab ang usa ka angol nga rebelde.

Nasakmit usab ang ubay-ubay nga de kalibreng armas ug mga bala gikan sa rebeldeng grupo.

Tungod niini, gipahibalo ni Col. Estella nga nagkahinay na ang pwersa sa maong grupo pinaagi sa abag sa mga lumulopyo gikan sa bukirang bahin sa probinsya.

Kini pinaagi sa pagpadala og mensahe sa text ngadto sa mga sundawo bahin sa presensya sa mga armadong grupo sa ilang lugar.

Sa higayon nga ma deklarar na nga conflict manageable ug development ready ang Negros Oriental,mosangpot kini sa dugang kaugmaran sa ekonomiya sa lalawigan ug ingon man ang natad sa turismio labi usab nga molipang sa maong lugar, matud pa ni Col. Estrella.

Atol unya sa himoong seremonya, si gobernador Roel Degamo, Armed Forces of the Philippines Commander, Major General Aurelio Baladbad ug Regional Director sa Philippine National Police sa rehiyon 7 nga si P/CSupt. Danilo Constantino maoy mamirma sa usa ka joint declaration.

Kasamtangan nga gipadayon sa Bayanihan Team Operations sa Philippine Army ang combat operations sa lalawigan aron mahunong na sa hingpit ang tanang kalihokan sa mga rebeldeng grupo.

Padayon usab ang pakiglambigit sa Philippine Army ngadto sa lokal nga opisyal sa lokal nga kagamhanan,non government organizations(NGOs) ug local nga mga molupyo alang sa hiniusang tumong nga mawagtang na sa makausa ang mga rebeldeng grupo sa probinsya sa Negros Oriental.