Priso ug Multa Ipahamtang sa Mipusil sa Pawikan

●12 katuig nga priso ug P1 milyon’g multa ang silot sa mipusil sa usa ka green sea turtle sa Toledo City.

Gibaharan sa Department of Environment and Natural Resources (DENR)-7 nga mabilanggo sulod sa 12 ka tuig ug pamultahon og P1 milyon isip silot sa mga tawo nga mipusil sa usa ka green sea turtle nga babaye nga nakit-an didto sa kadagatan sa Barangay Bato, Toledo City, Cebu nga may upat ka samad pinusilan.

Matud pa ni DENR-7 Executive Regional Director Isabelo Montejo nga ang pagpasipala sa mga endangered species sama sa green sea turtle, kalapasan sa balaod pinaagi sa pag-ingon nga “killing, destroying, inflicting injury, trading, collecting, hunting, and possessing of these critically endangered species”.

Silotanan kini subay sa gipahigayin sa balaod kalabot sa ” Wildlife Resources Conservation and Protection Act of 2001 or Republic Act No. 9147.”

Si Montejo nagkanayon nga si bisan kinsa nga mapamatud-an nga mopatay o mopasipala sa mga wildlife species mahimong pahamtangan og silot sa pagkapriso gikan sa unom hangtud sa 12 ka tuig ug pagmulta gikan sa P100 mil ngadto sa P1 ka milyon.

Lakip nga masilotan ubos sa maong balaod ang mga mangingisda nga midakop niini, mga negosyante nga mipalit ug niluto sa unod sa pawikan.

Gipahibawo usab ni Montejo nga banhawon sa iyang buhatan ang Task Force Pawikan subay sa nakita nga padayon nga pagpanakop sa mga pawikan ug pagbaligya niini sa mga kan-anan sa kamerkadohan sa syudad sa Sugbo sama sa barangay Pasil.

Iyang gitataw nga ang Task Force Pawikan nga langkoban sa mga kapolisan, ubang ahensiya sa kagamhanan ug mga local government units gitahasan sa pagdakop sa nakalapas sa maong balaod ilabi na sa mosagop, moihaw ug moluto sa pawikan.

Samtang mipagawas usab og panukdanan si Montejo nga nagmando sa tanang mga regional technical director for protected area, wildlife, and coastal zone management services sa pagpahgiayon kanunay og monitoring sa mga lugar nga sagad puy-an o itlogan sa mga green sea turtles sulod sa Tanon Strait Protected Seascape (TSPS) aron mahingusgan ang pagproteher ug ingon man ang hugot nga pagpatuman sa environmental laws ilabi na sa Barangay Bato, Toledo City diin narescue ang samaron nga green sea turtles.