Presyo sa School Supply Gimonitor sa DTI

● Negosyante giawhag nga tumanon gyud nila ang suggested retail price aron dili mapasakaan og kaso sa buhatan sa DTI.

Gihugtan karon sa Department of Trade and Industry (DTI)-7 ang pagmonitor sa presyo sa mga school supply sa amihanang bahin sa lalawigan sa Sugbo human gilibkas sa maong ahensya ang price freeze kon pagkontrolar sa presyo sa mga nag-unang palaliton sa mga lugar nga naapektohan pag-ayo sa bagyong Yolanda.

Kini aron sigurado nga makapalit gyud ang mga ginikanan sa mga panginahanglanon sa mga bata alang sa ilang pag-eskwela sa makatarunganon nga presyo.

Sigon pa sa DTI-7 Provincial Officer and Consumer Welfare and Business Regulation Chief Zaide Bation nga giuna nila sa pagsusi ang mga school supply, sama sa notebook, papel, lapis ug uban pa didto sa amihanang bahin sa lalawigan sa Sugbo ug ubang probinsiya sa Central Visayas nga naapektohan sa bagyo.

Gipahimangno-an ni Bation ang nga negosyante sa mga gamitonon sa mga nagtunghang kabataan nga tumanon gyud nila ang suggested retail price aron dili sila mapasakaan og kaso sa buhatan sa DTI.

Hinuon gipahibawo ni Bation nga gikan sa bulan sa Abril hangtud sa unang adlaw sa Hunyo, ang ilang buhatan wala pa makamatikod nga may mga negosyante nga nagpa-over price sa presyo sa school supplies.

Giawhag hinuon ni Bation ang publiko sa pag-report sa ilang buhatan kun makamatikod sila may pagtaas sa presyo sa mga supply sa tulunghaan.