‘Presyo sa NFA Rice Wala Mosaka’

Kusganong gipanghimakak sa National Food Authority (NFA)-7 ang taho nga misaka usab ang presyo sa NFA rice sa kamerkadohan sa syudad sa Sugbo ug sa tibuok Central Visayas.

Kini taliwala sa pagsaka og P.50 sa presyo sa mga commercial rice matag kilo.

Matud sa tigpamaba sa NFA-7 nga si Ma. Lucia Rosales, ang presyo ra hinuon sa mga premium rice maoy misaka og P.50

Si Rosales nagkanayon nga ang ilang buhatan walay kasayuran sa hinungdan sa pagsaka sa mga nag-una nga palitonon ug sa maayong klase sa bugas.

Apan siya nagtuo nga posibling lain na usab kining epekto sa naghinubrang kainit karon sa panahon tungod sa sa El Niño.

Subli usab nga gipahibawo ni Rosales nga ang presyo sa NFA rice nagpabilin nga tag P27.00 matag kilo.

Aron pagsiguro nga dili gyud mosaka ang presyo sa NFA nga bugas, si Rosales miingon nga ang ilang mga kawani gipakatap sa kamerkadohan alang sa hugot nga pagmonitor sa presyo sa ilang bugas.

Gani gipahibawo ni Rosales nga ang ilang buhatan dili magpanuko sa paglangkat sa lisensiya sa mga rice retailer sa NFA sa higayon nga mapatud-an nila ang kalapasan niini.

Hinuon iyang gitataw nga sa pagkakaron wala pa silay nakonpirmar nga nausab ang presyo sa NFA rice.