Presyo sa Bugas Gi Abuso?

Ang mga tigbaligya og bugas giawhag karon ni Mayor Michael Rama nga dili mopahimulos sa higayon pinaagi sa pagpamahal sa presyo.

Sa samang higayon giawhag ni Mayor Rama ang kadagkoan sa Department of Trade and Industry (DTI) nga molihok dayon aron pugngan ang abuso sa ubang mga magpapatigayon nga mipamahal na sa ilang bugas.

Miabot sa opisina sa mayor ang report nga ang presyo sa Ganador Rice miabot na og P52 ngadto sa P54 nga unta ang maong matang sa bugas gibaligya ra man sa tag P46 sa wala pa ang bagyo.

Daghan ang napugos sa paghunong na pagpalit og Ganador ug mibalhin sa mas barato nga bugas. Apan ang ubang mga ubos-ubos og presyo, misaka gihapon ang kantidad.

Kadtong mga presyo sa Ivory Rice nga gibaligya kaniadto sa ta’g P41 ang kilo karon gibaligya na sa tag P46 ug P47.

Matud ni Rama nga ang mga magpapatigayon angay gayud unta nga motabang sa mga biktima sa bagyo pinaagi sa pagpabilin ra sa presyo sa ilang baligya nga bugas.